Annar hjólatúr á frídegi

 Fór í hjólatúr um slóðir sem ég er vanalega ekki mikið að hjóla um.  Hér er kort af leiðinni.

 Tölulegar staðreyndir um túrinn.

Hér er ég komin úr Kópavoginum og á leið upp Álftaneshæðina.  Þarna (til vinstri) er stígur sem var ekki kominn síðast þegar ég hjólaði þarna um, en þá fór maður inn í hverfið og á götuna.  Þessi stígur er kærkominn.  En jafnframt galli að það er ekkert útsýni af honum bara grænar girðingar sitthvoru megin.

Hér er ég í Garðabænum á göngubrú, en ég næ ekki að átta mig á því hvort myndin er tekin í átt að Hafnarfirði eða Kópavogi.  Þarna var ég aðeins tínd og vissi ekki alveg hvaða leið ég átti að fara.

 Þess vegna var mjög kærkomið að sjá þetta skilti sem sýnir göngu og hjólaleiðir á svæðinu.

Svo rakst ég á frænda minn Jón Bjarna, en hann var á leið til vinnu.  Gaman að því.

Mig hefur lengi langað að hjóla þennan stíg.  Hef horft á hann löngunar augum í hvert skipti sem ég hef ekið fram hjá honum í bíl (þetta er þar sem IKEA er bara hinumegin við veginn). Og loksins rættist sá draumur.

Kópavogur.  Mjög svo kjánalegt að það er engin tenging yfir í stíginn sem er hinumegin við götuna.  Greinilegt þó að margir fara þarna um þar sem kantsteinninn hefur látið verulega á sjá.

"Hjólað í vinnuna" á frídegi

Ákvað að fara í hjólatúr um gamlar slóðir í dag þar sem ég er í fríi.  Fór þennan hring réttsælis.  Veðrið var fínt, skýjað og lítill vindur, hitinn á mælinum heima um 8°C.

Stoppaði aðeins við gamla vinnustaðinn til að smella af mynd.  Þetta var góður vinnustaður og það var ljómandi fínt að hjóla þangað.

Var búin að ákveða að hjóla í fyrsta skipti eftir nýja hjólastígsbútnum við Sæbraut en þá er hann lokaður ennþá með moldarhrúgum hér og þar (sem virðast settar þar í þeim eina tilgangi að gera stíginn ónothæfan.  Svo jómfrúarferðin eftir þeim stíg bíður betri tíma.

Aðeins lengra eftir stígnum er verið að búa til útskot sem ég ímynda mér að verði með bekkjum til að sitja á og njóta útsýnisins.  Þarna er oft ansi magnað sjónarspil þegar nótt breytist í dag og öfugt, eða þegar norðurljósin leika um himininn.

Einu sinni (fyrir mörgum árum) sendi ég ábendingu til Reykjavíkurborgar um að setja lýsingu á stíginn (sem verið er að gera núna).  Það er ansi dimmt á stígnum þarna í dimmasta skammdeginu þar sem götulýsingin nær ekki bakvið skólphreinsistöðina.  En það sem tapast við ljósið er norðurljósasýnin og þess vegna var ég eiginlega búin að skipta um skoðun um að rétt væri að setja lýsingu þarna.  Stundum þegar ljósin léku um himininn stoppaði ég, slökkti ljósin á hjólinu og naut sýningarinnar.

Á leiðinni (var um 45 mín að hjóla) taldi ég 51 á hjóli.  Fæstir af þeim voru í "einkennisbúningi hjólara" (skærum jakka eða endurskinsvesti og þröngum svörtum hjólabuxum) heldur í hversdagslegum fötum og var ég mjög ánægð að sjá það.  Þetta er öfugt við þá sem ég mæti á morgnana þegar ég hjóla í vinnuna í gegnum Elliðaárdalinn.  En hver og einn verður að fá að hafa sinn stíl og þó það henti mér best að vera á borgarhjóli og í venjulegum fötum þá veit ég að mörgum finnst skemmtilegt að klæða sig uppá fyrir tilefnið og þá hafa þeir það þannig.

Það er gott að hefja daginn á hjólatúr, hvernig sem maður kýs að klæða sig.

Hvaða hjól á ég að fá mér?

Ég er að skoða að fá mér nýtt hjól þar sem hjólinu mínu var stolið fyrr í mánuðinum.  Hjólið þarf helst að uppfylla nokkrar kröfur eins og t.d. að hægt sé að hjóla á því allan ársins hring (verður að vera hægt að setja undir það nagladekk), að maður sitji uppréttur, að það sé fallegt, að hægt sé að vera með körfu framan á stýrinu og böglabera aftaná.
Hjólið sem ég missti uppfyllti allt þetta nema það fyrst og það var stærsti gallinn við hjólið sem að öðru leiti var svo til fullkomið.

Nú hef ég skoðað tvö hjól, annað í Hjólaspretti og hitt í Markinu.  Þau uppfylla bæði flest skilyrðin sem ég set, en svo kíkti ég inn á heimasíðu Berlinar reiðhjólaverslunar og hjólin þar eru svo falleg.

Fyrst fór ég í Hjólasprett í Hafnarfirði og þar skoðaði ég þetta hjól:

Það er á breiðari dekkjum en mitt hjól var á og það er hægt að setja undir það nagladekk.  Mér finnst það allt í lagi í útliti (en er ekki heilluð upp úr skónum).  Gírarnir eru innbyggðir og það er kostur, mig minnir að þeir séu 8, það kemur fullbúið með ljósum og bögglabera sem er líka plús.

Svo fór ég í Markið og skoðaði þetta hjól:

Það er eins með það og hjólið frá Hjólaspretti, það er fallegt en ekki að heilla mig upp úr skónum.  Dekkin eru jafn breið og á hjólinu frá Hjólaspretti og hægt að setja nagladekk undir.  Það kemur líka fullbúið með ljósum og bögglabera.

Svo er það hjólin frá Berlin:

 Þetta hjól er næstum 2x dýrara en hin hjólin, en sjáið hvað það er miklu fallegra!  Þetta er hjól sem ég er heilluð af.  Það er hægt að fá það í næstum hvaða lit sem er.  En ég á eftir að fara að skoða hjá þeim og veit ekki hvort það er hægt að setja undir þau nagladekk.

Fjöldi gíra er ekki eitthvað sem skiptir mig öllu máli, þeir verða að vera til staðar og líklega duga 8 gírar til að hjóla allan ársins hring (lendi reyndar af og til í því á veturnar að gírarnir frjósi og þá er bara hjóla á þeim eina gír), en ég veit að ég hef ekkert með 21 gír að gera.  Á vetarahjólinu (sem er 21 gíra) var ég svo til alveg hætt að nota annað en miðjutannhjólið að framan.  Fór aldrei í það léttasta og bara af og til í það þyngsta.

Hjólað í maí 2017

Í mánuðinum hjólaði ég samtals 338 km, þar af 326 km til og frá vinnu og 12 km annað. 
Sá að meðaltali 21 aðra á hjóli á leið minni til vinnu en eins og á hverju ári þá er átakið "Hjólað í vinnuna"haldið í maí og maður sér verulegan mun á fjölda hjólandi um leið og átakið hefst 

Hjólaði 16 af 21 vinnudegi, 3 daga var ég í fríi og 2 var það mikið rok að ég ákvað að skilja hjólið eftir heima.

Það var mikið áfall þegar hjólinu mínu var stolið í byrjun mánaðarins (sjá eldri færslu). Ég hef fengið það bætt úr tryggingunum en er enn að melta það hvernig hjól ég fæ mér í staðin.  Mig langar mikið í fallegt borgarhjól aftur, en ég þarf að geta hjólað á þvi allan ársins hring og er hrædd við að vera á mjórri dekkjum á veturna. Hef notað hjól eiginmannsins á veturnar sem er trek-hjól á breiðum dekkjum.  Það hjól er orðið lúið og vil ætlum að losa okkur við það.  Hann keypti sér hinsvegar nýtt sumarhjól frá útlöndum (fallegt 6 gíra hjol) sem er á enn mjórri dekkjum en hjólið mitt var á (þessu sem var stolið) svo ekki get ég notað það í vetur.  Ég hingsvegar hjóla á því núna þar til ég tek ákvörðun um nýtt hjól handa mér.

Að komast til og frá vinnu á hjóli

Það er miserfitt að koma sér til og frá vinnu á hjóli.  Áður en vinnan mín flutti var það ekki mikið tiltöku mál (úr Laugardalnum og niður í bæ).  Stundum erfiðara en aðra daga út af veðri en sjaldnast ófært.  Vegalengdin mátuleg og úr nokkrum leiðum að velja.

Síðastliðið sumar flutti vinnan hinsvegar upp á Hólmsheiði.  Vegalengdin hefur tvöfaldast og er að mínu mati ófær á hjóli síðustu 4 km um leið og það er farið að rökkva á ferðatíma.

Sú leið sem ég hef oftast farið er þessi (þegar ég hjóla alla leið):

Þetta eru um 12 km og fyrstu 8 eru mjög fínir, fer um Elliðaárdalinn sem er bæði fallegur og þar eru góðir stígar. En frá Olís í Norðlingaholti hef ég farið eftir þjóðvegi 1, þar er ágætis vegöxl, en mér finnst óþægilegt að hafa bílana á fullri ferð við hliðina á mér og það er þó nokkur umferð stórra bíla (rútur og flutningabílar).  Allra síðasti búturinn finnst mér þó verstur.  Þar er ég á götunni sem er frekar þröng og liggur í hlykkjum sem hindrar útsýni. Hef velt því fyrir mér hvort það gæti verið betra að hjóla á móti umferð þennan síðasta spöl.  Þá sæi ég amk bílana sem eru að koma.  Og það er meiri umferð þarna en ég bjóst við.

Í morgun ákvað ég að prófa aðra leið.  Samstarfsmenn hafa verið að benda á að það séu allskonar leiðir um heiðina.  Ég byrjaði á að skoða "strava heatmap" sem er mjög sniðugt og sýnir hvar þeir sem nota strava (forrit sem heldur utan um hreyfingu manna) ferðast um.  Hér er svæðið mitt á umræddu korti:

Út frá þessu valdið ég mér leið í morgun og hún var þessi:

Ég er á borgarhjóli sem er 6 gíra og á mjóum dekkjum.  Þessi leið er ekki mjög heppileg fyrir það hjól, en er líklega ágætlega fær á fjallahjóli eða amk hjóli á breiðari dekkjum.  Hlekkurinn upp þarna í lokin er svo til allur á malarvegi.  Þessi leið er 2 km lengri en venjulega leiðin en það er ótvíræður kostur að losna við að hafa bílana sér við hlið.
Þessa mynd tók ég þegar ég var komin langleiðina á áfangastað:

Eftir að hafa skoðað leiðina sem ég fór á korti ákvað ég að prófa enn aðra leið heim. Eða þessa leið:

Hún virkaði styttri á kortinu en var það ekki.  Rúmir 14 km eins og leiðin sem ég fór í morgun.  Vegurinn er líka mjög grófur og hentar einstaklega illa hjólinu sem ég var á.

Svo þessi leið verður ekki farin aftur.  En ég gæti vel hugsað mér að fara hina leiðina aftur á öðru hjóli.

Í gær var hjólinu mínu stolið.

Vorið 2014 keypti ég mér sumarhjól.  Mig vantaði nýtt hjól og ætlunin var að finna eitthvað sem væri fallegt, nýttist í hjólreiðar allan ársinshring og ég væri ekki borgrandi fram á stýrið á því.  Þetta hjól uppfyllti tvennt af þessu og ég féll algjörlega fyrir því.  

Ég var búin að skoða nokkur hjól, sem voru ágæt en ekki að kveikja neistann, en það má segja að þetta hafi verið ást við fyrstu sýn.  Hjólið er 8 gíra með fram og afturljósum sem knúin eru með því að hjóla.  Eini gallinn við það er að það er ekki hægt að setja nagladekk undir það, plássið milli dekkja og bretta er einfaldlega of lítið.

Hér er styttan af skáldinu Tómasi að virða fyrir sér hjólið og honum líst bara nokkuð vel á held ég.

Við tókum þátt í tweedride eitt árið.  Mamma fékk sér eins hjól og við hekluðum pilsahlífar á hjólin.

Þessa mynd hér fyrir neðan tók dóttir mín á filmumyndavél af mér og hjólinu og mér þykir verulega vænt um þessa mynd.

Og á síðasta ári keypti ég bastkörfu framan á hjólið.

En svo eftir vinnu í gær kom ég að tómum hjólagámi í Mjóddinni.  Ég hafði læst hjólinu við þessa grind, eins og ég hef reyndar gert í allan vetur (var þá á öðru hjóli).

 Lásinn hafði verið slitinn í sundur og var það eina sem var eftir af eigum mínum í hjólagámnum.

 Það er sárt þegar eigur manns eru teknar ófrjálsri hendi.  Ég hef átt gæðastundir á þessu hjóli og hef beðið þess með eftirvæntingu í allan vetur að geta hjólað á því aftur.  Ég held í vonina að hjólið finnist einhversstaðar og skili sér til baka til mín, en mér þykir það samt ólíklegt.

Hjólað í apríl 2017

Í mánuðinum hjólaði ég samtals 182 km, þar af 137 km til og frá vinnu og 45 km annað. 
Sá að meðaltali 8 aðra á hjóli á leið minni til vinnu.  
Hjólaði 11 af 26 vinnudögum, 5 daga var ég í fríi.
Meðalhraðinn hjá mér til vinnu fyrstu þrjá mánuði ársisn var um 13,5 km/klst en núna í apríl 14,7 km/klst.  Það munar töluvert að stígarnir eru auðir.

Hjólað í mars 2017

Í mánuðinum hjólaði ég samtals 240 km, þar af 189 km til og frá vinnu og 51 km annað. 
Sá að meðaltali 9 aðra á hjóli á leið minni til vinnu.  
Hjólaði 21 af 23 vinnudögum, 2 daga var ég á námskeiði sem ég reyndar hjólaði á, en taldi ekki þá sem ég sá á leiðinni.

Hjólað í febrúar 2017

Í mánuðinum hjólaði ég samtals 178 km, þar af 172 km til og frá vinnu og 6 km annað. 
Sá að meðaltali 7 aðra á hjóli á leið minni til vinnu.  
Hjólaði 16 af 20 vinnudögum, 3 daga sleppti ég að hjóla vegna veðurs eða færðar og 1 dag var ég á námskeiði sem ég reyndar hjólaði á, en taldi ekki þá sem ég sá á leiðinni.  Hjólaði næstum alla dagana upp í Mjódd en fór nokkrum sinnum upp í Norðlingaholt þegar veður og færð var gott.  Febraúar með eindæmum mildur, en svo síðustu helgina féll 51 cm jafnfallinn snjór í Reykjavík (aðfararnótt sunnudagsins 26. febrúar).

Viðbót 6.3.2017:

Samanburður milli ára, fjöldi hjólandi í Reykjavík

Nú tókst mér að finna hjá mér skráningu á árinu 2010 í sambandi við hjólreiðar mínar og talningu á hjólandi á leið minni til vinnu.
Í skjalinu fann ég reiknivillu sem útskýrir óvenjulegt stökk í fjölda hjólandi í ágúst 2010 í línuriti sem ég setti inn fyrir stuttu.  Svo eru líka óvenju háar tölur nokkrum sinnum á því sama ári sem ég hef ekki séð síðan.  T.d. þann 17 maí 2010 skrái ég að ég hafi talið 64 á hjóli þann morgun.  1. og 2, júní taldi ég 50 og 42 og svo 24. ágúst 40.
Til samanburðar þá er stærsta talning árið 2015: 33 og 2016: 31 hjólandi á einum morgni.
Svo ég tók mig til og "lagfærði" fyrst reiknivilluna og svo þessar stóru tölur niður í 20-24 sem er mjög algengur fjöldi í talningu (fæ svo til sömu tölur út ef ég eyði talningunum alveg út).  Tel ég mig með þessu vera að fá betri samanburð milli ára.

Fyrst ber ég hér saman árið 2010 og 2015 (með þessum nýju útreikningum).  Þau ár er ég að hjóla frá sama stað og að sama stað.  Legg af stað um kl 7:40 og er komin á áfangastað fyrir kl. 8:00.  Frá Sundahverfi og niður í bæ. Vegalengd milli 4,5 og 6 km.   Tölurnar eru meðaltal hvers mánaðar á fjölda hjólandi sem ég tel þá morgna sem ég hjóla til vinnu.

Hér er sýnishorn af skráningu, tók út janúar 2010.  Smellið að myndina til að sjá stærri útgáfu af henni.

Á miðju ári 2016 flutti vinnustaðurinn minn úr miðbænum og upp á Hólmsheiði, sem er nokkuð út fyrir þéttbýlið.  Þetta þýðir að ég er núna að hjóla í öfuga átt við það sem ég gerði áður og vegalengd og tími er aðeins annar.  Yfir sumarið hjólaði ég alla leið, sem er um 12 km en þegar fór að rökkva á morgnana þá stytti ég leiðina niður í 8 km og fékk far síðasta spölinn.  Þegar jólin nálguðust og veður urðu risjóttari hjólaði ég í Mjóddina og fékk far þaðan, þangað er um 4 km.  Ég legg fyrr af stað, er að hjóla frá 7:00 til 7:40 (eða 8:00 þegar ég hjóla alla leið).
Hér er samanburður milli 2010 og 2016:

Mér finnst að út þessum tölum megi lesa mikla fjölgun hjólandi á morgnana í Reykjavík milli þessara ára.  Þó þessi talning sé á engan hátt vísindaleg þá má leika sér að því að bera tölurnar saman.

Bætt við 16.2.2017.  Leiðin sem ég hjólaði lang, lang oftast:

Hjólað í janúar 2017

Í mánuðinum hjólaði ég samtals 238 km, þar af 179 km til og frá vinnu og 59 km annað. 
Sá að meðaltali 6 aðra á hjóli á leið minni til vinnu.  Flesta sá ég 16. jan. en þá sá ég 11 og fæst 1, það var 4.. janúar. 
Hjólaði 20 af 22 vinnud-gum, 1 dag sleppti ég að hjóla vegna veðurs og hinn daginn var ég á námskeiði og það hentaði ekki að vera á hjólinu.  Hjólaði alla dagana nema einn upp í Mjódd.

VIðbót frá endomondo:

Samanburður milli ára, fjöldi hjólandi

Mér til gamans ber ég hér saman fyrsta árið sem ég taldi og skráði niður þá sem ég sá á hjóli þá daga sem ég hjólaði til vinnu.

Hér er samanburðu á árunum 2010 (ljósblátt) sem er fyrsta árið sem ég skráði niður þá sem ég taldi og ársins 2016 (dökkblátt).
Í júlí árið 2016 fór ég að hjóla aðra leið og í allt aðra átt en áður svo tölurnar eru ekki alveg samanburðarhæfar með öllu.

þess vegna set ég hérna inn líka samanburð á árunum 2010 og 2015.  Þau ár var ég að hjóla svo til sömu leið, oftast meðfram Sæbraut, en stundum Suðurlandsbraut og af og til einhverjar útfærslur frá þeim tveimur leiðum.

Fyrir utan þetta ógurlega stökk sem verður í talningu í ágúst 2010 (sem ég hef ekki skýringu á) þá má vel lesa aukningu á hjólandi út frá þessum tölum.  Líka gaman að sjá hversu mikil áhrif átakið "Hjólað í vinnuna" hefur á fjölda hjólandi þó þeim fari fjölgandi í apríl líka.

Tala hvers mánaðar er sem sagt fundin þannig að á hverjum morgni skrái ég hjá mér hversu marga ég sé.  Eftir mánðuinn reikna ég út meðaltal hjólandi á hvern dag mánaðarins og það er talan sem fer í töfluna.

Hjólaárið 2016

Hjólaði samtals 3.610 km á árinu.  Mest eru þetta ferðir til og frá vinnu eða 2.868 km og 742 í aðrar ferðir.  En ég hjólaði 202 af 251 vinnudögum ársins.  Af þessum 49 vinnudögum sem ekki voru hjólaðir eru 7 vegna ófærðar eða veðurs, 2 vegna veikinda og restin er svo orlof eða aðrar ástæður.

Á miðju ári flutti vinnustaðurinn minn úr miðbænum og upp á Hólmsheiði og lengdist vegalengd til vinnu úr tæpum 6 km í u.þ.b.12 km. Það tók mig nokkurn tíma að finna bestu leiðina þarna uppeftir og voru fyrstu ferðirnar eitthvað lengri, en nú tel ég mig hafa fundið hana.  Þetta er nokkuð upp í móti á morgnan og er meðalhraðinn á þá13 til 14 km/klst en á heimleið 15 til 17 km/klst.

Þegar myrkrið skall á hætti ég að hjóla alla leið í vinnuna og lét mér nægja að hjóla upp að Olís í Norðlingaholti (u.þ.b. 8 km leið) og fá far þaðan.  Seinnihluta desember hjólaði ég svo í Mjódd (4,5 km) og fékk far þaðan.

Hér er mynd og tafla sem sýnir talningu mína á hjólandi fólki á morgnana (ég mæti til vinnu kl. 8) og samanburður milli ára.  Línuritið er af meðaltalstölum hvers mánaðar.

Árið í ár stendur út í okt., nóv. og des með fjölda hjólandi.  Líklega er það vegna þess að ég er að fara nýjar leiðir.

Hér er svo samanburður á vegalengdum sem ég hef hjólað milli ára (reyndar er eitthvað smá um labb þarna líka en það er ekki mjög mikið).

Hjólað í desember 2016

Í mánuðinum hjólaði ég samtals 199 km, þar af 184 km til og frá vinnu og 15 km annað. 
Sá að meðaltali 10 aðra á hjóli á leið minni til vinnu.  Flesta sá ég 10. nóv. en þá sá ég 18 og fæst 2, það var á Þorláksmessu og líklega margir tekið sér frí.

Hjólaði ekki nema 15 af 21 vinnudegi, 3 daga sleppti ég að hjóla vegna veðurs, og aðra 3 daga voru aðrar ástæður og jafnvel einhverskonar leti sem spilaði þar inní.

Hjólað í nóvember 2016

Í mánuðinum hjólaði ég samtals 338 km, þar af 250 km til og frá vinnu og 88 km annað. 
Sá að meðaltali 12 aðra á hjóli á leið minni til vinnu.  Flesta sá ég 10. nóv. en þá sá ég 19 og fæst 6 og það var í gær (30.11.2016) en ég var verulega undrandi á þvi hvað ég sá fáa þar sem veðrið var svipað og verið hefur, svo til logn og rigning..
Hjólaði 15 af 22 vinnudögum, tók 4 orlofsdaga, 1 dag sleppti ég að hjóla vegna veðurs, 1 veikindadagur og svo slappleiki eftir veikindi og ég fékk far þann daginn.

Veturinn hingað til hefur verið nokkuð mildur.  Það snjóaði þegar ég var í orlofi svo ég fékk ekki reynslu á það hvernig fyrsti snjómokstur er eftir að snjóað hefur, þ.e. hvort búið er að hreinsa leiðina sem ég fer fyrst á morgnana.  Þegar ég svo mætti aftur til vinnu var búið að skafa alla stígar.  Svo tók við stutt klakatímabil og eftir það fór aftur að rigna.  Ég vona að veturinn verði frekar mildur og ekki mikið um rok.