Hjóla- og göngutúr.

Á laugardaginn fór ég með hjólið á verkstæði Hjólaspretts í Hafnarfirði þar sem það var keypt.

Það var kominn tími á uppherslu og ég ákvað í leiðinni að láta setja nagladekk undir (vonandi allt of snemma).  Ég tók því rólega og stoppaði af og til og tók myndir.

Fyrsta myndin er tekin við enda Langholtsvegar (Suðurlandsbraut) þar sem verið er að byggja fjölbýlishús fyrir eldra fólk að ég held. 

Hér er ég svo í undirgöngunum undir Reykjanesbraut (Sæbraut) við Sprengisand.

Síðan er það Kópavogurinn.  Þarna er ég að koma að Smáralindinni og er að velta fyrir mér hvaða leið ég á að fara.

Og ég held ég hafi valið þá erfiðustu því ég fór upp laaaaanga brekku.  Það hlýtur að vera hægt að hjóla þægilegri leið.  Þetta snapp var tekið þegar ég var komin langleiðina upp brekkuna.

Hér er ég hinumegin við hæðina, komin í Garðabæ (?) eða allavega á leiðinni þangað.  Við endann á stígnum eru undirgöng til vinstri og stígur til hægri sem ég fór.

Ég er ekki alveg sú besta í sjálfum, og þarna langaði mig að ná mynd af hjólinu líka, en það sést bara rétt svo í stýrið.

Hér er ég komin í Hafnarfjörð, rétt hjá IKEA.  Þessi stígur er flottur þar sem hann hlykkjast í gegnum hraunið.

Ég lenti svo í ógöngum við endann á hraunstígnum, þurfti að snúa við og fara þessa leið og hér er ekki gert ráð fyrir gangandi eða hjólandi.

Og núna var hjólið komið á verkstæði og ég hafði ákveðið að mig langaði að prófa að ganga til baka.   Þetta listaverk eftir Grím Marinó er við Fjarðarkaup.  Hef aldrei séð það héðanmegin frá.

Þetta skilti biður fólk um að sýna tillitsemi hvort til annars á stígunum.

Hér er ég aftur í Garðabæ, hafði valið ranga leið á stígnum sem liggur í hring og er hugsað fyrir hjól til að komast upp á göngubrúna yfir veginn.  Ég hefði átt að taka stíginn til vinstri, en það vissi ég ekki fyrir, en veit núna.

Fallegur lækur og brú við stíginn.

Byggingarsvæði í Garðabæ.

Kópavogur og æskuheimilið falið bakvið nýbyggingar (séð frá Árnarnesi)

Á stígunum í Kópavogi eru svona "bækur" á staurum hér og þar.

Hamraborg í Kópavogi, og nú var ég komin með nóg af labbi og hringdi eiginmanninn og fékk hann til að sækja mig.

Flókin gatnamót

Þetta er leiðin sem ég hjóla þessa dagana til og frá vinnu.  Inn á kortið hef ég teiknað rauðan hring utan um þann stað á leiðinni sem mér finnst vera erfiðastur.  Það er af því að gatnamótin þarna eru flókin, ekki yfir Sæbrautina sjálfa (sem myndin er af hér fyrir ofan), þar eru komin ágætis ljós, heldur rétt þar fyrir neðan.

Þetta sést betur á þessari mynd hér fyrir neðan.  Ég hef teiknað inn örvar til að sýna bílaumferð sem maður verður að vera meðviðtaður um og fylgjast með, gleymdi reyndar að setja örvar fyrir þá sem fara beint. Einnig er töluverð umferð á hjólum sem líka þarf að taka með í reikninginn.  Bláa línan er sú sem ég hjóla.  Reyndar eru menn duglegir að stoppa og hleypa yfir, en ekki allir.  Gæti þessi staður orðið öruggari með því að setja hringtorg?  Ég er svo sem ekki mikill aðdáandi hringtorga, en veit um gatnamót sem hafa batnað töluvert með komu þeirra (hringtorgið hjá Glæsibæ), en kannski er aðeins of langt á milli Dugguvogar og Knarrarvogar til þess að það gangi upp, ég ætla ekki að þykast hafa vit á því.  Hingsvegar er þetta svæði varasamt eins og það er og mundi ég svo gjarnan vilja hafa það einhvernvegin öðruvísi.

Og smá úr garðinum

Hef aðeins verið að breyta í garðinum.  Breytti undirstöðunum þar sem gróðurhúsið var í jarðarberjabeð, færði runna og fékk nýjar plöntur.

Hér var sem sagt áður gróðurhús en er nú jarðarberjabeð.  Setti niður hvítlauksrif fyrir aftan beðið eftir að hafa minnkarð hindberjarunnana.

Hér voru alparifsrunnar sem ég færði niður fyrir húsið og fékk fullt af spennandi plöntum í staðin  Allar eiga þær það sameiginlegt að falla á veturnar og vaxa upp á nýtt næsta sumar.  Þá getur nágranninn án samviskubits mokað snjónum úr innkeyrslunni yfir girðinguna hjá okkur í vetur.  Hlakka til að sjá hvernig þær koma undan vetrinum næsta sumar.

Og hér er alparifsið á nýja staðnum.

Hjólað í ágúst 2017

Í mánuðinum hjólaði ég samtals 292 km, þar af 237 km til og frá vinnu og 55 km annað. 
Sá að meðaltali 14 aðra á hjóli á leið minni til vinnu.

Hjólaði 16 af 22 vinnudögum, 6 daga var ég í fríi.

Hér er smá staðreyndir um samanlagða hreyfingu hjá mér frá því ég fór að nota endomondo (sem var í apríl 2013).

Viðbót 6.9.2017:

Hjólaði upp í Grafarvog.  Þar eru fínir stígar og fallegt að koma.  En sum gatnamót eru ekki skemmtileg.  Eins og þessi hérna sem eru rétt hjá útilistaverkunum.  Eins og sést á myndinni heitir gatan Borgarvegur.  Ljósmyndirnar eru ekki alveg nógu góðar en gefa samt einhverja hugmynd.

Séð hinumegin frá.  Setti appelsínugular línur á þessa mynd til að sýna betur hvert leiðin liggur ef þú ert á hjóli eða gangandi:

 Þessi loftmynd er tekin af Borgarvefsjá og hér sést vel hversu flókin þessi gatnamót eru.

Væri ekki snilld að steja undirgöng, t.d.hér?

Hjólað í júlí 2017

Í mánuðinum hjólaði ég samtals 253 km, þar af 188 km til og frá vinnu og 65 km annað. 
Sá að meðaltali 11 aðra á hjóli á leið minni til vinnu.

Hjólaði 11 af 20 vinnudögum, 9 daga var ég í fríi.

Keypti mér nýtt hjól í Hjólaspretti í Hafnarfirði um miðjan mánuðinn.
Hér má sjá fyrsta hjólatúrinn frá verslun og heim. (smellið á textann).  
Og hér er mynd af mér og hjólinu eftir fyrsta hjólatúrinn.

Þetta er Kalhkoff hjól, 8 gíra með ljósi bæði framan og aftan sem knúið er áfram með því að hjóla.  Gírarnir eru inni í öxlinum á afturdekkinu og er mér sagt að það endist mikið betur en þegar gírarnir eru utanáliggjandi þar sem drulla og slíkt kemst ekki að gírbúnaðinum.  Ég smá áhyggjur af vetrarhjólreiðum á þessu hjóli af því dekkin eru mjórri en ég hef verið á, en vonandi eru það óþarfa áhyggjur.  Svo eru fótbremsur á því og það hefur tekið smá tíma að venjast því að geta ekki slegið pedalana aftur.

Mánuðurinn var vætusamur framanað og hér er mynd af mér þar sem ég er komin heim rennandiblaut eftir óvenju mikla rigningu en góðan meðvind á leið úr vinnu.

Svo er nokkuð um viðhald og endurnýjun á stígum sem er gott auðvitað en það hefur áhrif á leiðarval.  Hér er framkvæmd óvenju vel merkt og bent á hjáleiðir.

Viðbót 8.8.2017.  Skilaboð frá endomondo

Hjólað í júní 2017

Í mánuðinum hjólaði ég samtals 303 km, þar af 244 km til og frá vinnu og 59,1 km annað. 
Sá að meðaltali 18 aðra á hjóli á leið minni til vinnu.

Hjólaði 16 af 21 vinnudegi, 5 daga var ég í fríi.

Annar hjólatúr á frídegi

 Fór í hjólatúr um slóðir sem ég er vanalega ekki mikið að hjóla um.  Hér er kort af leiðinni.

 Tölulegar staðreyndir um túrinn.

Hér er ég komin úr Kópavoginum og á leið upp Álftaneshæðina.  Þarna (til vinstri) er stígur sem var ekki kominn síðast þegar ég hjólaði þarna um, en þá fór maður inn í hverfið og á götuna.  Þessi stígur er kærkominn.  En jafnframt galli að það er ekkert útsýni af honum bara grænar girðingar sitthvoru megin.

Hér er ég í Garðabænum á göngubrú, en ég næ ekki að átta mig á því hvort myndin er tekin í átt að Hafnarfirði eða Kópavogi.  Þarna var ég aðeins tínd og vissi ekki alveg hvaða leið ég átti að fara.

 Þess vegna var mjög kærkomið að sjá þetta skilti sem sýnir göngu og hjólaleiðir á svæðinu.

Svo rakst ég á frænda minn Jón Bjarna, en hann var á leið til vinnu.  Gaman að því.

Mig hefur lengi langað að hjóla þennan stíg.  Hef horft á hann löngunar augum í hvert skipti sem ég hef ekið fram hjá honum í bíl (þetta er þar sem IKEA er bara hinumegin við veginn). Og loksins rættist sá draumur.

Kópavogur.  Mjög svo kjánalegt að það er engin tenging yfir í stíginn sem er hinumegin við götuna.  Greinilegt þó að margir fara þarna um þar sem kantsteinninn hefur látið verulega á sjá.

"Hjólað í vinnuna" á frídegi

Ákvað að fara í hjólatúr um gamlar slóðir í dag þar sem ég er í fríi.  Fór þennan hring réttsælis.  Veðrið var fínt, skýjað og lítill vindur, hitinn á mælinum heima um 8°C.

Stoppaði aðeins við gamla vinnustaðinn til að smella af mynd.  Þetta var góður vinnustaður og það var ljómandi fínt að hjóla þangað.

Var búin að ákveða að hjóla í fyrsta skipti eftir nýja hjólastígsbútnum við Sæbraut en þá er hann lokaður ennþá með moldarhrúgum hér og þar (sem virðast settar þar í þeim eina tilgangi að gera stíginn ónothæfan.  Svo jómfrúarferðin eftir þeim stíg bíður betri tíma.

Aðeins lengra eftir stígnum er verið að búa til útskot sem ég ímynda mér að verði með bekkjum til að sitja á og njóta útsýnisins.  Þarna er oft ansi magnað sjónarspil þegar nótt breytist í dag og öfugt, eða þegar norðurljósin leika um himininn.

Einu sinni (fyrir mörgum árum) sendi ég ábendingu til Reykjavíkurborgar um að setja lýsingu á stíginn (sem verið er að gera núna).  Það er ansi dimmt á stígnum þarna í dimmasta skammdeginu þar sem götulýsingin nær ekki bakvið skólphreinsistöðina.  En það sem tapast við ljósið er norðurljósasýnin og þess vegna var ég eiginlega búin að skipta um skoðun um að rétt væri að setja lýsingu þarna.  Stundum þegar ljósin léku um himininn stoppaði ég, slökkti ljósin á hjólinu og naut sýningarinnar.

Á leiðinni (var um 45 mín að hjóla) taldi ég 51 á hjóli.  Fæstir af þeim voru í "einkennisbúningi hjólara" (skærum jakka eða endurskinsvesti og þröngum svörtum hjólabuxum) heldur í hversdagslegum fötum og var ég mjög ánægð að sjá það.  Þetta er öfugt við þá sem ég mæti á morgnana þegar ég hjóla í vinnuna í gegnum Elliðaárdalinn.  En hver og einn verður að fá að hafa sinn stíl og þó það henti mér best að vera á borgarhjóli og í venjulegum fötum þá veit ég að mörgum finnst skemmtilegt að klæða sig uppá fyrir tilefnið og þá hafa þeir það þannig.

Það er gott að hefja daginn á hjólatúr, hvernig sem maður kýs að klæða sig.

Hvaða hjól á ég að fá mér?

Ég er að skoða að fá mér nýtt hjól þar sem hjólinu mínu var stolið fyrr í mánuðinum.  Hjólið þarf helst að uppfylla nokkrar kröfur eins og t.d. að hægt sé að hjóla á því allan ársins hring (verður að vera hægt að setja undir það nagladekk), að maður sitji uppréttur, að það sé fallegt, að hægt sé að vera með körfu framan á stýrinu og böglabera aftaná.
Hjólið sem ég missti uppfyllti allt þetta nema það fyrst og það var stærsti gallinn við hjólið sem að öðru leiti var svo til fullkomið.

Nú hef ég skoðað tvö hjól, annað í Hjólaspretti og hitt í Markinu.  Þau uppfylla bæði flest skilyrðin sem ég set, en svo kíkti ég inn á heimasíðu Berlinar reiðhjólaverslunar og hjólin þar eru svo falleg.

Fyrst fór ég í Hjólasprett í Hafnarfirði og þar skoðaði ég þetta hjól:

Það er á breiðari dekkjum en mitt hjól var á og það er hægt að setja undir það nagladekk.  Mér finnst það allt í lagi í útliti (en er ekki heilluð upp úr skónum).  Gírarnir eru innbyggðir og það er kostur, mig minnir að þeir séu 8, það kemur fullbúið með ljósum og bögglabera sem er líka plús.

Svo fór ég í Markið og skoðaði þetta hjól:

Það er eins með það og hjólið frá Hjólaspretti, það er fallegt en ekki að heilla mig upp úr skónum.  Dekkin eru jafn breið og á hjólinu frá Hjólaspretti og hægt að setja nagladekk undir.  Það kemur líka fullbúið með ljósum og bögglabera.

Svo er það hjólin frá Berlin:

 Þetta hjól er næstum 2x dýrara en hin hjólin, en sjáið hvað það er miklu fallegra!  Þetta er hjól sem ég er heilluð af.  Það er hægt að fá það í næstum hvaða lit sem er.  En ég á eftir að fara að skoða hjá þeim og veit ekki hvort það er hægt að setja undir þau nagladekk.

Fjöldi gíra er ekki eitthvað sem skiptir mig öllu máli, þeir verða að vera til staðar og líklega duga 8 gírar til að hjóla allan ársins hring (lendi reyndar af og til í því á veturnar að gírarnir frjósi og þá er bara hjóla á þeim eina gír), en ég veit að ég hef ekkert með 21 gír að gera.  Á vetarahjólinu (sem er 21 gíra) var ég svo til alveg hætt að nota annað en miðjutannhjólið að framan.  Fór aldrei í það léttasta og bara af og til í það þyngsta.