Hjólað í september 2022

Hjólaði samtals 349 km í mánuðinum þar af 198 til og frá vinnu. 

Hjólaði 131 km á stóra hjólinu sem er með rafmótor og 218 á venjulega hjólinu. 

Hef leikið mér að því að reikna út hvað hver km hjólaður á rafhjólinu kosti miðað við hvað hjólið kostaði í upphafi. í upphafi þessa árs var hver hjólaður km á kr. 3.333 en er núna kominn niður í 800 kr. (hjólið var keypt í ágúst á síðasta ári).

Sá að meðaltali (á dag þá daga sem ég hjólaði til vinnu): 18 á hjóli, 4 á hlaupahjóli/rafskútu og 15 gangandi.

Nagladekkin fóru undir hversdagshjólið 20. september.

Einn af skemmtilegri hjólatúrum mánaðarins var þegar ég skuttlaði stelpunni minni upp í Breiðholt. Þar sem við erum ekki vel kunnar staðháttum á stígakerfum sem liggja upp í Breiðholt fórum við aðeins lengri leið en hefði þurft. Hjólið höndlaði þetta vel. Það er gefið upp að hámarks þyngd sem boxið ber sé 60 kg og við vorum alveg í efstu mörkum þeirra þyngdatakmarkana. Brekkurnar upp í Breiðholtið eru ansi brattar og notaði ég kröfutugustu hjálparstillinguna til að komast upp þær en þurfti engu að síður að puða töluvert með sjálf.

Þetta er leiðin sem við fórum:

Og svona vorum við alla leiðina, skæl brosandi því það var gaman að vera saman og þetta er fáránlega skemmtilegur ferðamáti

Hér er svo hjólið þó á þessari mynd sé annarskonar farangur í því.

Hjólað í ágúst 2022

Hjólaði samtals 257 km í mánuðinum þar af 99 til og frá vinnu. 

Hjólaði 80 km á stóra hjólinu sem er með rafmótor og 177 á venjulega hjólinu. Hef leikið mér að því að reikna út hvað hver km hjólaður á rafhjólinu kosti miðað við hvað hjólið kostaði í upphafi. í upphafi þessa árs var hver hjólaður km á kr. 3.333 en er núna kominn niður í 991 kr. (hjólið var keypt í ágúst á síðasta ári).

Sá að meðaltali (á dag þá daga sem ég hjólaði til vinnu): 20 á hjóli, 5 á hlaupahjóli/rafskútu og 14 gangandi,

Svo eru hér nokkrar myndir teknar á hjólarúntum í mánuðinum

 

Hjólað í júlí 2022

Hjólaði samtals 177 km í mánuðinum þar af 85 til og frá vinnu. Ekki varð nú jafn mikið úr hjólaferðum þennan mánuðinn eins og ég hafði vonað. Síðustu tvær vikur mánaðarins var ég í orlofi. Fór af landi brott í nokkra daga og kom heim með Covid19 og er enn að ná upp orku eftir það.

Hjólaði 62 km á stóra hjólinu sem er með rafmótor og 114 á venjulega hjólinu. Hef leikið mér að því að reikna út hvað hver km hjólaður á rafhjólinu kosti miðað við hvað hjólið kostaði í upphafi. í upphafi þessa árs var hver hjólaður km á kr. 3.333 en er núna kominn niður í 1.162 kr. (hjólið var keypt í ágúst á síðasta ári).

Sá að meðaltali (á dag þá daga sem ég hjólaði til vinnu): 12 á hjóli, 5 á hlaupahjóli/rafskútu og 13 gangandi, 

Hjólað í júní 2022

Hjólaði samtals 305 km í mánuðinum þar af 128 til og frá vinnu. Hjólaði alla vinnudaga mánaðarins til vinnu fyrir utan eina viku sem ég var í orlofi.

Hjólaði 86 km á stóra hjólinu sem er með rafmótor og 219 á venjulega hjólinu.

Sá að meðaltali (á dag þá daga sem ég hjólaði til vinnu): 15 á hjóli, 5 á hlaupahjóli/rafskútu og 12 gangandi, 

Á 17. júní hjólaði ég með ömmustrák niður í bæ. Við lögðum hjólinu í bílastæðakjallaranum í Hörpu og röltum svo um bæinn.

Hér má svo sjá hvað ég hef hjólað það sem af er þessu ári.

Hitakort Strava (Strava heatmap)

Mér finnst þetta mjög sniðugt fyrirbæri og gaman að geta séð þetta kort. Hitakortið sýnir hvar notendur Strava hjóla. Því bjartari sem leiðin er því meira er hún hjóluð. Smelltu hér til að skoða kortið.

Hér getum við séð hvar er mikið hjólað og/eða hvar menn nota strava í evrópu:

Hér er svo litla landið mitt:

Og höfuðborgarsvæðið:

Og svona í lokin mitt persónulega hitakort. Ég byrjaði að nota Srava 1.12.2020:

Aðeins til útskýringar þá er ég ekki íþróttamaður og nota hjólið aðallega sem samgöngutæki, þó ég eigi það alveg til líka að fara í hjólatúra sem ekki hafa annan tilgang en að hjóla, en held mig almennt á stígum og innan bæjarmarka.

Hjólað í maí 2022

Hjólaði samtals 374 km í mánuðinum þar af 196 til og frá vinnu. Hjólaði alla vinnudaga mánaðarins til vinnu. Aðeins 2 daga þessar mánaðar fór ég ekkert á hjólið.  

Hjólaði 113 km á stóra hjólinu sem er með rafmótor og 260 á venjulega hjólinu.

Sá að meðaltali (á dag þá daga sem ég hjólaði til vinnu): 18 á hjóli, 5 á hlaupahjóli/rafskútu og 17 gangandi, sem er aukning frá síðasta mánuði. En ég skal viðurkenna ekki eins mikil aukning og ég átti von á. Átakið Hjólað í vinnuna hófst 4. maí og stóð til 24. maí. Venjulega er veruleg aukning þegar það átak hefst. En í ár vorum við svo óheppin að það kólnaði verulega í upphafi átaks. Ég var farin að óttast hálkubletti þegar hitinn fór niður í frostmark yfir nóttina. En fann þó sem betur fer ekki fyrir hálku.

Fjóldamet hjólandi í mánuðinum er 35 á en fæst sá ég 9.

Heildar talning í mánuðinum var: 388 á hjóli, 95 á hlaupahjóli og 348 gangandi.

Það hafa nokkrar línur bæst við hitakortið mitt á Strava í mánuðinum. Þetta er það sem ég hef hjólað það sem af er þessu ári

Hjólatúr á laugardegi (e-bike) og sami hringur á sunnudegi (venjulegt hjól)

Það er nýlegur hjólastigur í Kópavoginum sem liggur frá Lindahverfi (rétt hjá Smáralind) og upp í Salarhverfi sem ég hef látið mig dreyma um að hjóla. Og í gær lét ég verða af því. Þetta er töluvert löng brekka svo ég ákvað að fara þetta á stóra-hjólinu sem er með rafmótor.

Fyrst var að koma hjólinu út úr skúrnum. Hann var smíðaður löngu áður en mér datt í hug að kaupa þetta hjól. Þetta sleppur til, en er alltaf svolítið maus

Veðrið var mjög fínt, glampandi sól og svolítill vindur. Hér er brúin yfir Miklubraut.

Elliðaárdalurinn er alltaf fallegur

Hér er ég komin fram hjá kanínusvæðinu milkla og undir undirgöngin. Þá tekur þessi líka fína hæna á móti mér.

Hér eru bygginga framkvæmdir, er farin að nálgast Kópavoginn.

Hér var hefur veruleg framför átt sér stað. Þetta er Hlíðardalsvegur í Kópavoginum. Búið er að gera gang- og hjólabraut yfir götuna. Síðast þegar ég fór þessa leið (fyrir nokkrum árum) var bara kantsteinn og ekki gert ráð fyrir að neinn vildi komast yfir götuna

Komin upp í Kórahverfi

Hér er göngubrú og auðvitað var hjólað yfir hana.

Fallegt útsýnið, nýtur sín alls ekki nógu vel á mynd samt.

Já, nei ég er ekki að fara með þetta hjól yfir þessa brú. Hér var snúið við og önnur leið valin

Verið að tvöfalda stíginn hér og aðskilja hjólandi og gangandi. Frábært framtak, hlakka til að hjóla nýja stíginn.

Núna er komin nýr dagur og ég ákvað að fara sömu leið aftur bara á hversdagshjólinu mínu. Hér kem ég að hringtorgi við Lindaveg-Fífuhvammsveg. Og núna vissi ég að aðeins ofar, til vinstri eru þessi fínu undirgöng svo ég þarf ekki að fara yfir götuna sjálfa. Mætti alveg setja smá skilti þarna til að benda á það, það er örstutt í göngin.

Hérna áði ég í gær og líka í dag. Aðeins rauðari í framan, tók meira á að fara upp brekkurnar þegar enginn er hjálparmótorinn.

Að sjálfsögðu var þessu hent inn í Strava, og hér er hægt að bera ferðirnar saman. Skrítið að tæknin vill meina að ég eyddi meiri orku (384 kaloríur) í fyrri ferðinni þegar ég get augljóslega fundið það á kroppnum að ferðin í dag tók meira á (362 kaloríur).

Viðbót bætt við 04.06.2022:

Hér er leiðin sem ég hjólaði:

Hjólað í apríl 2022

Hjólaði samtals 203 km í mánuðinum þar af 122 til og frá vinnu. Hjólaði 15 af 17 vinnudögum mánaðarins, páskarnir voru núna í apríl og tók ég tvo orlofsdaga.

Sá að meðaltali (á dag þá daga sem ég hjólaði til vinnu): 12 á hjóli, 3 á hlaupahjóli og 15 gangandi, sem er veruleg aukning frá síðasta mánuði..
Fjóldamet hjólandi í mánuðinum er 21 á en fæst sá ég 3.

Heildar talning í mánuðinum var: 173 á hjóli, 48 á hlaupahjóli og 226 gangandi.

Sumardekkin fóru undir hjólið 20. apríl, daginn fyrir sumardaginn fyrsta. Ágætis sumargjöf fyrir sjálfamig.

Svona lítur hitakortið út það sem af er árinu:

Fór nokkrar ferðir á stóra-hjólinu, þar af 2 vinnuferðir sem voru mjög skemmtilegar. 

Hjólaði því samtals 32 km á því hjóli. Ein ferðin hafði þann tilgang að hjálpa litum ömmukút af taka smá lúr, og það tókst svona líka ljómandi vel.

Hjólað í mars 2022

Hjólaði samtals 207 km í mánuðinum þar af 163 til og frá vinnu. Hjólaði 20 af 23 vinnudögum mánaðarins. Einn dag var veðurspáin það leiðinlega að ég ákvað að labba frekar og svo sprakk á afturdekkinu og það tók 2 daga að fá það lagað. Fékk nýtt afturdekk því skv. verkstæðinu voru naglarnir farnir að stingast inn í dekkið og það sprengdi slönguna.

Sá að meðaltali (á dag þá daga sem ég hjólaði til vinnu): 5 á hjóli, 1 á hlaupahjóli og 11 gangandi.
Fjóldamet hjólandi í mánuðinum er 10 á en fæst sá ég 1.

Heildar talning í mánuðinum var: 100 á hjóli, 12 á hlaupahjóli og 215 gangandi.

Nú er allur snjór farinn og færðin orðin töluvert léttari.

1. mars var ég rúmar 30 mínútur á leið til vinnu. Meðalhraðinn 8,7 km/klst. Þetta var ansi slæmur dagur og færðin mjög leiðinleg.

31. mars var ég rétt rúmar 15 mín. Meðalhraðinn 17,5 km klst.

Fór tvær ferðir á stóra-hjólinu. Fyrstu ferðirnar á þessu ári. Það er alveg jafn gaman að hjóla í því í ár og á síðasta ári. Seinni ferðin var farin til að sækja ömmubarn á leikskólann og það var ennþá skemmtilegra að hjóla með farþegann.

Svona lítur hitakortið út það sem af er þessu ári:

Svo er hér mynd sem mér þykir vænt um. Hún var tekin þegar ég var á leiðinni heim úr vinnuni nú í mars

Hjólað í febrúar 2022

Hjólaði samtals 145 km í mánuðinum þar af 93 til og frá vinnu. Hjólaði aðeins 13 af 20 vinnudögum mánaðarins. En febrúar hefur verið óvenju snjóþungur mánuður eins og sjá má á þessari frétt: Snjóþyngsti febrúar í Reykjavík frá aldamótum. Út af veðri og færð þá labbaði ég til vinnu 3 sinnum, 3 daga vann ég heima og fór ekki út að hjóla fyrir vinnu eins og ég hef hingað til gert þó ég sé heima og einn daginn var önnur ástæða fyrir því að ég hjólaði ekki.

Sá að meðaltali (á dag þá daga sem ég hjólaði til vinnu): 5 á hjóli, 1 á hlaupahjóli og 8 gangandi. Ekki mikil breyting þar frá janúar, þó færðin hafi verið töluvert mikið verri.
Fjóldamet hjólandi í mánuðinum er 9 á en fæst sá ég 1.

Heildar talning í mánuðinum var: 62 á hjóli, 10 á hlaupahjóli og 106 gangandi.

Hef mikið pirrað mig á snjóhreinsun stíga þennan mánuðinn. Augljóslega hefur verið mikið að gera í snjómokstrinum og það hefur komið fram að það náðist ekki að hreinsa alla stíga í samræmi við skipulag. Nú höfum við farið í gegnum heimsfaraldur (geri hér ráð fyrir og vona innilega að við séum þar á lokametrunum) og þá hafa verið virkjaðar allskonar viðbragðsáætlanir. Eins þegar óveður skella á landinu erum við með litakóða sem segja okkur við hverju má búast. Einnig hefur komið fram að u.þ.b. á 5 ára fresti koma tímabil þar sem meiri snjór fellur í Reykjavík en flest ár. Svo ég velti fyrir mér hvort ekki sé kominn tími til að setja á nokkurskonar viðbragðsáætlun varðandi snjóhreinsum stíga. T.d. væri hægt að setja á "of mikill sjór" viðbragð og þá er aðaláherslan á að hreinsa aðalleiðir og farið í hliðar leiðri eftir því sem við er komið. 

Fyrir mig sem samgönguhjólara þá skiptir öllu að geta treyst því að komast á þokkalega skafinn stíg. Ég er alveg til í að puðast út götuna mína og á hliðarstígum með þá vissu að aðalstígurinn sé fær. Eins væri ég alveg til í að fara lengri leið ef það þýðir að ég komist á vel hreinsaðan stíg.

Hér er hitakortið frá Strava það sem af er þessu ári. Maður hefur ekki farið mikið annað er til og frá vinnu og svo í heimsóknir til dótturinnar í Grafarvog.

Svona var færðin á Suðurlandsbrautarstígnum síðasta dag febrúarmánaðar og þarna var ég bara nokkuð sátt með þessa svörtu rönd. Það sem sést ekki sérlega vel á myndinni er að snjórinn sitthvoru megin við röndina er hallandi upp, í vel gleitt vaff og svo koma hraukarnir. En röndin er það breið þarna að það var fínt að hjóla á henni.

 

Ferðalag úr sundahverfi upp í Grafarvog og smá um hjólateljara.

 Út af veðri og færð hef ég ekki hitt ömmubarnið mitt eins oft og ég hefði viljað. Þess vegna ákvað ég í gærmorgun að leggja af stað á hjólinu til að heimsækja fólkið mitt. Það var rok, 9 m/s og 18 m/s í vindhviðum skv. vegagerðinni og skafrenningur svo ég var meira en tilbúin til að hætta við ferðina og snúa við ef mér litist ekki á færð og veður. En reynslan hefur kennt mér að oft eru meiri læti í veðrinu þegar maður er innandyra en utan (eins kjánalega og það hjólmar).

Svo ég lagði af stað. Það hefur ekki snjóað síðan á fimmtudaginn svo það hefur allavega ekki bætt í snjóinn. Ferðin gekk vel alveg þar til ég kom að bútnum sem liggur frá Barðavogi niður að Sæbraut, fyrir neðan leikskólann Steinahlíð. Þar hefur eitthvað stórundarlegt átt sér stað í gærdag, því þegar ég hjólaði þar í gærmorgun var færðin fín. En á leiðinni heim var kominn snjór á stíginn eins og tæki hefði farið þarna um og hugsanlega farið utan í ruðningara og dreift snjó yfir stíginn.

Allavega þurfti ég að teyma hjólið yfir þennan stíg. En stígurinn eftir það var fínn og alveg niður að Knarrarvogi. En þá kom í ljós að nokkuð hafði skafið yfir hjólastíginn sem heiti Kelduleið skv. Borgarvefsjá svo ég fór yfir á göngustíginn. Það var enginn annar á ferðinni svo það kom ekki að sök.

Þarna hinsvegar var ég farin að finna fyrir rokinu, enda mótvindur og svæðið nokkuð bert. En leiðin upp í Grafarvog var vel fær, af og til hafði snjór fokið í litla skafla yfir stíginn sem annaðhvort var furðu auðvelt að hjóla í gegnum eða ég leiddið hjólið yfir.

Svo kem ég að hringtorginu þar sem Sævarhöfði og Naustabryggja mætast.

Myndin er tekin deginum áður svo ég vissi hverju ég átt i von á í þetta skiptið. Stígurinn er sem sagt opinn þar sem örin er á þessari mynd hér:

Það er allavega betra en að þurfa að klöngrast yfir snjóbakkann sem liggur yfir stíginn sem tekur við þarna beint á móti.

Leiðin hét svo áfram að vera greið alla leið að Gullinbrú. Brúin sjálf (þ.e. göngubrúin undir bílabrúnni) var ekki neitt sérstaklega skemmtileg. Tækin fara líkega ekki yfir brúna sjálfa því það eru hraukar í sitthvorum enda brúarinnar, þó ekki það stórir að maður kemst alveg yfir.

Svo færðin var töluvert betri en ég þorði að vona og mér gekk bara vel að komast í heimsókn og heim aftur. Í bakaleiðinni hafði snjó skafið enn meira yfir stígana, en hann er súper léttur og oft furðu auðvelt að hjóla í gegnum hann, þó stundum þyrfti ég líka að stíga af hjólinu og teyma í gegnum skaflana.

Ég var rétt rúmar 30 mínútur hvora leið, sem ég fer á um 15-20 mínútum þegar ekki er snjór.

En þá að hjólateljurum. Borgin hefur komið teljurum fyrir víða um borgina (telja bæði hjólandi og gangandi). 

Hér er teljarinn á Geirsnefi, milli appelsínugulu brúnna. Hann taldi í gær 7 að fara í austur átt og 7 að fara í vesturátt (ég hef tekið út tölur um gangandi). 

En það er eins og hann hafi ekki talið mig þegar ég hjólaði þarna í gær. Ég hef litað gular tölur sem eru nálægt tímanum sem ég var á ferðinni, en það er samt öfugt við í hvaða átt ég er að ferðast.

Svo er hér teljarinn við Gullinbrú. Hann taldi í gær 7 að fara í austur og 4 í vestur. 

Talningin á mér er lituð græn í excelskjalinu og stemmir alveg við þann tíma sem ég var á ferðinni.

Ég er bara að velta fyrir mér hvort teljararnir eigi í vandræðum með talningu þegar svona mikill snjór er. Nú veit ég ekki hvernig þeir telja. En þegar ég á sínum tíma hjólaði fram hjá teljaranum við Suðurlandsbraut sem staðsettur er nálægt Kringlumýrarbrautinni, þessi sem sýnir talninguna, þá náði hann ekki að telja þegar mikill snjór eða klaki var yfir stígnum.