Hjólatalning - tölfræðin mín

 Ég á í excel-skjali hjá mér talningu á þeim sem hjóla á morgnana þegar ég hjóla til vinnu frá árinu 2010.

Fyrir þann tíma skráði ég ekki talninguna. Út frá þessum tölum er ég með meðaltal á því hveru marga ég sé á hjóli á dag í hverjum mánuði. Mér finnst gaman að skoða þessar tölur og því deili ég þeim hér.

Árin 2018 - 2020 var ekki talning af persónulegum ástæðum en talning er hafin aftur og þó leiðin sem ég hjóla sé ekki sú sama og áður og vegalengdin örlítið styttri, þá tel ég þær tölur alveg samanburðarhæfar.

Hér hef ég sett upp í línurit fyrir hvert ár fyrir sig.

Og hér er árið 2021 það sem komið er. Athugið að október er ekki búinn og því gæti talan breyst eitthvað og af því það er október þá er engin talning í nóvember og desember.

Aðeins rýnt í tölurnar:

Í maí á hverju ári er átakið Hjólað í vinnuna og hefur það augljós áhrif á fjölda hjólandi. 

Ég mundi giska á að árin 2011 og 2017 hafi vorið verið kalt því talningin fram að maí er mjög svipuð en tekur svo stökk. 

Júlí er líklega vinsæll orlofsmánuður því talan á það til að detta niður þá.

Ég er spennt að sjá hvernig talningin í nóvember og desember kemur út í ár því 2016 og 2017 eru fleiri að hjóla allt árið þar sem talningin minnkar ekki mikið þá mánuði, eins og árin á undan. Ætli það verði eins núna?

Nýtt:

Í ár hef ég bætt við talningu á gangandi og hlaupahjólum/rafskútum og hér eru meðaltalstölur fyrir hvern ferðamáta eftir mánuðum. Sami fyrirvari og áður með október sem enn er vika eftir af.

Hjólað í september 2021

Hjólaði samtals 291 km í mánuðinum þar af 155 til og frá vinnu. Hjólaði 22 af 22 vinnudögum.

Sá að meðaltali (á dag þá daga sem ég hjólaði til vinnu): 12 á hjóli, 3 á hlaupahjóli og 15 gangandi.
Fjóldamet mánaðrins er 21 á hjóli en fæstir voru 4.

Heildar talning í mánuðinum var: 256 á hjóli, 60 á hlaupahjóli og 319 gangandi.

Og svona lítur hitakortið mitt út (sleppi slaufunni upp að Gljúfrasteini frá í sumar, hægt að sjá hana í fyrri færslum)

Nagladekkin fóru undir hjólið 23. september og það mátti varla seinna vera því nokkra morgna eftir það hefur verið ísing á stígum.

Hér má sjá skáningu september mánaðar:

Hjólað í ágúst 2021

Hjólaði samtals 232 km í mánuðinum þar af 105 til og frá vinnu. Hjólaði 15 af 21 vinnudögum, var í orlofi þá daga sem vantar uppá. 

Sá að meðaltali (á dag þá daga sem ég hjólaði til vinnu): 16 á hjóli, 4 á hlaupahjóli og 15 gangandi.

Heildar talning í mánuðinum var: 233 á hjóli, 63 á hlaupahjóli og 223 gangandi.

Og svona lítur hitakortið mitt út (sleppi slaufunni upp að Gljúfrasteini frá í sumar, hægt að sjá hana í fyrri færslum)

Það skemmtilegasta sem gerðist í þessum mánuði er að ég keypti mér nýtt hjól. Mig hefur í nokkurn tíma dreymt um að eiga svokallað nytjahjól. Og ég skoðaði og prófaði tvö. Eitt Kristjaníju hjól á þremur dekkjum sem var notað en í mjög góðu ástandi og svo annað glænýtt á tveimur dekkjum. Bæði hjólin voru með rafmótor. Ég féll strax fyrir nýja hjólinu, það er ótrúlega meðfærilegt. Danska hjólið fannst mér skrítið að hjóla á, en það var meira en helmingi ódýrara en nýja hjólið svo eftir svolítinn umhugsunartíma var ákveðið að bjóða í það - ég hlyti að geta vanist því hugsaði ég. En þá var það selt.

Svo ég reyndi að sannfæra mig um að ég þyrfti ekkert svona hjól... það væri mesta vitleysa að vera láta sig dreyma um þetta. Og tvær vikur liðu, en mér gekk ekkert að taka hugann af hjólinu og líklega hjálpaði ekki til að ég hjóla framhjá búðinni á hverjum degi þar sem því var stillt út í glugga. Og til að gera langa sögu stutta þá var farið í búðina og hjólið keypt og ég get sagt ykkur að þetta bara svo skemmtilegt. Ömmu krútti finnst alls ekki leiðinlegt að sitja í og mér finnst súper gaman að hjóla á því.

Hjólað í júlí 2021

Hjólaði samtals 266 km í mánuðinum þar af 62 til og frá vinnu. Hjólaði 9 af 22 vinnudögum, var í orlofi þá daga sem vantar uppá. 

Sá að meðaltali (á dag þá daga sem ég hjólaði til vinnu): 10 á hjóli, 1 á hlaupahjóli og 11 gangandi.

Heildar talning í mánuðinum var: 91 á hjóli, 12 á hlaupahjóli og 102 gangandi.

Hér má sjá hvernig "hitakortið" stendur eftir mánuðinn.

Fór í nokkra hjólatúra og þessi stendur algjörlega uppúr:

Þarna hjólaði ég með pabba og Logan upp að Gljúfrasteini. Við heimsóttum Halldór Laxness og Guðnýju (skoðuðum sem sagt safnið) og röltum eftir það niður að ánni og snæddum nesti. Tókum síðan lengri leiðina heim.

Hér er líka skemmtilegur hjólatúr sem ég fór með Eyrúnu og Logan. Reyndar var útsýnið ekkert þar sem þoka og líklega gosmóða lá yfir öllu. Meira að segja Esjan var hulin og eins og hún væri bara ekki á sínum stað.

Á þessari mynd ætti Gróttuviti að sjást en hann var líka hulinn þokumóðu:

Hjólað í júní 2021

Hjólaði samtals 242 km í mánuðinum þar af 127 til og frá vinnu. Hjólaði 18 af 21 vinnudögum. 

Sá að meðaltali (á dag þá daga sem ég hjólaði til vinnu): 13 á hjóli, 3 á hlaupahjóli og 11 gangandi.

Heildar talning í mánuðinum var: 241 á hjóli, 58 á hlaupahjóli og 192 gangandi.

Hitakortið mitt á Strava lítur svona út núna:

Í eitt skipti fór í ég hjólatúr um hverfið með það að markmiði að bæta línum á kortið. Mig langði út að hjóla, nennti ekki langt og þetta er útkoman:

Nokkrum sinnum hef ég sótt ömmustrákinn á leikskólann og oft notum við tækifærið og stoppum einhversstaðar á leiðinni til að gæða okkur á t.d. rúsínum eins og á þessari mynd og skoða líf, gróður og umhverfið almennt. Ómetanlegur tími sem við fáum þarna saman.

Svo prófaði ég glænýjan stíg í mánuðinum sem verið er að vinna við. Hann er í Grafarvoginum utanverðum. Það var búið að malbika allan stíginn þegar ég fór um hann en greinilega eftir að fínpússa og ganga frá. En flottur stígur og fallegt umhverfi. Léttir líka leiðina ef ætlunin er að fara í Skemmtigarðinn t.d. því maður losnar við töluverða brekku.

Hjólað í maí 2021

 Hjólaði samtals 257 km í mánuðinum þar af 135 til og frá vinnu. Hjólaði 18 af 19 vinnudögum. 

Sá að meðaltali (á dag þá daga sem ég hjólaði til vinnu): 20 á hjóli, 4 á hlaupahjóli og 11 gangandi.

Heildar talning í mánuðinum var: 361 á hjóli, 65 á hlaupahjóli og 202 gangandi.

Þetta er töluverð aukning í fjölda hjólandi og þeirra sem ferðast á hlaupahjóli, en mjög svipaður fjöldi gangandi og í síðasta mánuði. Átakið Hjólað í vinnuna stóð yfir tímabilðið 5. maí til og með 25. maí. Veðrið hafði leikið við höfuðborgarsvæðið alveg frá 26. apríl og þá strax varð töluverð fjölgun á fólki á stígunum og enn bætti í þegar átakið hófst.

Nokkrum línum bætt við hitakortið á Strava í mánuðinum, það er gaman að því.

Hjólað og labbað í apríl

Hjólaði samtals 187 km í mánuðinum þar af 88 til og frá vinnu. Hjólaði 13 af 18 vinnudögum. Hjólið fór á verkstæði eftir vinnu 13. apríl. Þá voru nagladekkin tekin undan því og sumardekkin undir og almenn yfirferð. Fékk nýja bremsuklossa og smurningu og stillingu á gírum og svona almennt viðhald. Svo á meðan hjólið var í viðgerð labbaði ég í vinnuna, fyrir utan einn dag sem ég var á bíl. Tvo daga eftir að hjólið kom af verkstæðinu var snjóföl og möguleiki á hálku svo ég skildi hjólið eftir heima og labbaði.

Sá að meðaltali (á dag þá daga sem ég hjólaði eða labbaði til vinnu): 11 á hjóli, 1 á hlaupahjóli og 13 gangandi.
Heildar talning í mánuðinum var: 188 á hjóli, 22 á hlaupahjóli og 213 gangandi.

Þeim fer ört fjölgandi sem eru í talningahópnum mínum og síðustu vikuna í apríl var mikil aukning enda er vor í lofti og sólin hefur verið að sýna sig.

Hitakortið í Strava heldur áfram að stækka og mér finnst ákaflega gaman að bæta línum við það.

Hjólað í mars

Hjólaði samtals 157 km í mánuðinum þar af 121 til og frá vinnu. Hjólaði 18 af 23 vinnudögum. Byrjaði mánuðinn að jafna mig eftir veikindi og missti því út heila viku sem er leiðinlegt, en lítið við að gera.

Sá að meðaltali (á dag þá daga sem ég hjólaði til vinnu): 8 á hjóli, 1 á hlaupahjóli og 9 gangandi.
Heildar talning í mánuðinum var: 150 á hjóli, 11 á hlaupahjóli og 157 gangandi.

Veðrið í mars var almennt gott. Komu nokkrir ansi kaldir dagar en það er nú eðlilegt í mars.Varla sást snjór og ekki mikil úrkoma.

Hitakortið á Strava hefur ekki mikið breyst frá síðasta mánuði. Leiðin til og frá vinnu orðin skarpari af því það hjóla ég oftast.Hef enn ekki farið út fyrir höfuðborgarsvæðið, enda er ég lang mest í samgönguhjólreiðum og hjólið mitt er borgarhjól og hentar ekkert sérlega vel utan malbiks.

Svo til gamans er hér samanburður á talningum mínum á 10 ára tímabili.

Til útskýringar þá vann ég áður niður í miðbæ og hjólaði u.þ.b. 5 km til og frá vinnu. Í dag hjóla ég u.þ.b. 4 km til vinnu. Ég er að hjóla á svipuðum tíma og mæti til vinnu kl. 8. Árið 2019 vantar í samaburðinn en það ár voru ekki talningar.

Hjólað í febrúar

Hjólaði samtals 154 km í mánuðinum þar af 104 til og frá vinnu. Hjólaði 16 af 20 vinnudögum. Endaði mánuðinn í veikindum og missti því út næstum heila viku sem var mikið svekkelsi.

Sá að meðaltali á dag (þá daga sem ég hjólaði til vinnu): 6 á hjóli, engann á hlaupahjóli og 10 gangandi.
Heildar talning í mánuðinum var: 96 á hjóli, 4 á hlaupahjóli og 146 gangandi.

Nú er komin smá reynsla á Strava. Ég er ekkert endilega ástfangin af því forriti. Fyrir mig er það of íþrótta-keppnis miðað, en það heldur utan umhreyfinguna mína og það er það sem ég vil.

Það allra skemmtilegasta við Strava er hitakortið (heatmap). Og svona lítur mitt út núna:

Augljóslega hjóla ég mest til og frá vinnu og svo er morgunkaffið á sunnudögum hjá mömmu og pabba að koma strerkt inn. Hlakka til að bæta við línum á þetta kort.

Hjólað í janúar

Janúar hefur verið snjóléttur og frekar kaldur í Reykjavík. 2x lét ég kuldann hafa áhrif á mig og sleppti því að hjóla.  Ég vinn heima aðra hvora viku en tók strax þá ákvörðun að hjóla samt í vinnuna þá daga sem ég er heima, fer þá bara í hring.  En þessa tvo daga tók letipúkinn yfirhöndina og ég lét það eftir honum að sleppa hjólinu.

Talningar eru einnig hafnar aftur á morgnana á leið í vinnu og hef ég bætt við að telja líka hlaupahjól og gangandi. Vegalengdin til vinnu er um 4,5 km (fer örlítið lengri leið af því það eru ekki nema 2 km til vinnu og það er bara svo stutt) og þegar ég vinn heima þá fer ég um 6 km hring, en talning er bara á fyrstu 4 km til að halda tölfræðinni á svipuðum slóðum.

Hér koma tölur janúar mánaðar:

Hjólaið stamtals 229 km í mánuðinum þar af 107 til og frá vinnu. Hjólaði 17 af 20 vinnudögum

Sá að meðaltali á dag: 6 á hjóli, engann á hlaupahjóli og 7 gangandi.
Heildar talning í mánuðinum var: 106 á hjóli, 6 á hlaupahjóli og 125 gangandi.

Eitt hefur angrað mig síðan í nóvember en það eru ljóslausir ljósastaurar á leiðinni minni. Ég sendi on þessa mynd seinnihlutann í nóvember því mér var farið að blöskra fjöldi staura sem voru ljóslausir. Rauðar doppur sýna u.þ.b. hvaða staurar þetta eru. Fékk strax svar til baka um að þau sæu um ansi marga staura og það væri farið yfir þetta í hverjum mánuði.

10. janúar var ekki enn komið ljós á staurana svo ég sendi þeim aftur og fékk svör til baka um að þetta væri augljóslega ekki eins og þau vildu hafa það.  Síðan þá hafa staurarnir í græna hringnum fengið ljós.  Þessir sem eru í bláahringnum veit ég ekki stöðuna á, allir hinir eru enn ljóslausir. Þetta þykir mér vera frekar lélegt, en vonandi fara menn að koma sér í málið.

Þegar ég skoða tölurnar mínar síðastliðin 10 ár eða svo þá er þessi km fjöldi í janúar í lægri kantinum. Áður hjólaði ég líka lengri leið til og frá vinnu. Fjöldi hjólandi er hinsvegar í hærri kantinum og leyfi ég mér að halda því fram að það séu skýr merki þess að það hafi bæst í hóp þeirra sem velja hjólið sem samgöngutæki Hlakka til að halda áfram að hjóla og safna tölum og talningum.

Uppfærsla 3.2.2021. Það eru líka komin ljós á staurana í bláa hringnum

Uppfærsla 13.3.2021. Staurarnir tveir neðst á myndinni (hjá tölunni 2) líka komnir með ljós.

 

Endomondo.  Forritið sem ég hef notað síðastliðin rúm 7 ár til að halda utan um hreyfinguna mína, aðalegga hjólerí er núna að hætta og ég hef fært mig yfir til Strava frá og með 1. desember 2020.

Við höfum átt góðar stundir saman og ég endomondo og hér er smá yfirlit.

Fyrsta skráning: 18. apríl 2013. 5,66 km – 21 mín og 6 sek – 16,1 km/klst meðalhraði.  Hjólað til vinnu.

Síðasta skráning: 29. nóvember 2020. 8,31 km – 38 mín og 54 sek – 12,82 km/klst meðalhraði.  Hjólað heim úr Kópavoginum, var í morgunkaffi hjá mömmu og pabba.

Í heildina hef ég ferðast rétt u.þ.b. hálfann hnöttinn á þessum tíma skv. þessari fínu mynd hér:

 

En ef ég tek bara samgönguhjólreiðar þá lítur þetta svona út:

En samgönguhjólreiðavalmöguleikinn var einmitt ein af ástæðunum fyrir því að ég valdi Endomondo í apríl 2013.  Á þessum rúmu 7 árum hef ég varið 1 mánuði, 17 dögum og 21 klst í að hjóla til og frá, aðallega vinnu en líka í heimsóknir, á tónleika og í verslanir.

Ég er ekki alveg eins dugleg að hjóla í hringi, þ.e. hjóla til að hjóla, en samt þetta er rétt rúm vika skv. þessari mynd:

Það kemur mér á óvart samt að ég hef gengið oftar og lengur en ég hef hjólað í hringi.  Mér finnst ég fara svo sjaldan út að labba.  En þetta er bæði samgöngulabb og líka labb í hringi.

Hér er annarskonar yfrlit eftir árum. Síðastliðin 3 ár hef ég verið að dunda við jóga æfingar og einnig verið duglegri að labba, eins og sjá má hér:

En nú kveð ég Endomondo og hef frá 1. desember síðastliðnum notað Strava. Vona að það verði farsæl samskipti í mörg mörg ár.

Hjólað í janúar frá árinu 2010 til og með 2018

Nú eru kaflaskil í mínu lífi.  Í gær lauk 20 ára starfi í fangelsunum á höfuðborgarsvæðinu.  Öll þessi ár hef ég hjólað til og frá vinnu, fyrst aðeins á sumrin en svo kom að því að mig langaði ekki að leggja hjólinu þegar kominn var vetur og þá voru keypt nagladekk undir hjólið.  Ég fór þá líka á kynningu á vetrarhjólreiðum hjá Fjallahjólaklúbbnum sem var fróðlegt og gott fyrir byrjanda að fara á.

Ég bý nálægt Laugardalnum og var lengst af að vinna niðri í bær.  Leiðin til vinnu 5 til 6 km eftir því hvaða leið ég valdi er mjög svo temmileg vegalengd.  Um mitt ár 2016 flutti vinnustaðurinn upp á Hólmsheiði og við það lengdist leiðin til vinnu um 100%.  Ég hjólaði til að byrja með alla leið.  En mér leið aldrei vel á þjóðveginum frá Norðlingaholti og svo eftir Nesjavallaleiðinni svo ég hætti að hjóla alla leið og fékk far frá Olís í Norðlingaholti og svo þegar vetraði hjólaði ég inn í Mjódd og fékk far þaðan.

En allan þennan tíma hef ég talið þá sem ég sé á hjóli og árið 2010 fór ég að skrá það hjá mér ásamt því að ég var farin að nota Garminúr til að halda utan um vegalengdir og slíkt.

Og af því að janúar var að ljúka þá hef ég tekið saman tölur sem ég á yfir janúar mánuði frá 2010 til og með 2018.

Fyrst er hér mynd úr excel-skjalinu mínu, þetta er janúar 2018:

Svo er hér tafla og samantekt yfir fjölda hjólandi sem ég sá á leið minni til vinnu á morgnana.  Ég mætti í vinnu kl. 8 og var því á ferðinni snemma morguns.

Og hér eru súlurit yfir það sama, fyrst heildartölur:

og svo meðaltal:

Og að lokum skráning yfir þá virku daga sem ég skildi hjólið eftir heima og hver ástæðan væri fyrir því.  Það kom mér verulega á óvart þegar ég fór að hjóla á veturnar hversu fáa daga ég mat það sem svo að veðrið eða færð væri of slæm til að hjóla.  Árið 2010 vantar hér inn þar sem ég var ekki farin að skrá hjá mér þá hversvegna hjólið var skilið eftir heima.

Hjólað í janúar 2018

Í mánuðinum hjólaði ég samtals 201 km, 177 til og frá vinnu og 24 km annað. Var að jafna mig eftir veikindi í 2 daga, einn dag hjólaði ég ekki vegna veðurs og einn dag var ég á bíl af því það var síðasti vinnudagurinn á vinnustað sem ég hef starfað á í 20 ár.  Hjólaði því 18 af22 vinnudögum.

Sá að meðaltali 9 aðra á hjóli á leið minni til vinnu.

Svona var aðkoman að hjóli mínu og vinnufélagamíns í lok síðasta dagsins sem ég hjólaði í vinnuna.

Bætt við 6.2.2017:

Hjólaárið 2017

Hjólaði samtals 3.025 km á árinu.  Mest eru þetta ferðir til og frá vinnu eða 2.647 km og 378 í aðrar ferðir.  En ég hjólaði 206 af 250 vinnudögum ársins.  Af þessum 44 vinnudögum sem ekki voru hjólaðir eru 6 vegna ófærðar eða veðurs, 3 vegna veikinda og restin er svo orlof eða aðrar ástæður.

Framundan eru breytingar hjá mér sem gera það að verkum að ekki verður lengur talning á þeim sem ég sé á hjóli á morgnana áleið minni til vinnu. Finnst mér því við hæfi að setja inn línurit sem sýnir ágætlega breytingu á fjölda hjólandi frá því ég hóf að skrá niður þessar talningar mínar árið 2010.  Tölurnar eru meðaltal þeirra sem ég taldi dag hvern á leið minni til vinnu.

Hér er taflan með meðaltalstölunum:

Ágúst 2010 hef ég lagfært örlítið þar sem tvo morgna í þeim mánuði sá ég mjög stóra æfingahópa sem skekktu meðaltalið óeðlilega.  Tók ég þær tölur út og fékk við það meðaltalið 11.  

Hér eru svo heildartölurnar fyrir hvern mánuð áður en meðaltalið er reiknað.  Þær tölur eru merkilegar í mínum huga þar sem þær sýna svo vel hversu mikið fleiri eru að hjóla í dag en árið 2010.

Sjáið bara, í janúar 2010 þá tel ég samtals 38 á móti 122 árið 2017.  Apríl talan 2017 skýrist af því að þá tók ég mér nokkra orlofsdaga.  Þess vegna er meðaltal hvers mánaðar betri mælikvarði, en það er engu að síður gaman að sjá hinar tölurnar líka.

Hjólað í desember 2017

Í mánuðinum hjólaði ég samtals 157 km, 145 til og frá vinnu og 12 km annað. Tók einn frídag og var svo veik 3 daga.  Hjólaði því 15 af19 vinnudögum.

Sá að meðaltali 9 aðra á hjóli á leið minni til vinnu.

Hjólað í nóvember 2017

Nóvember mánuður var einstaklega fallegur og gaf ég mér óvenju oft tíma til að stoppa og taka myndir.  Færðin var líka misjöfn og fór ég almennt hægar yfir.  Myndin hér fyrir ofan er tekin í byrjun mánaðarins.

Í mánuðinum hjólaði ég samtals 218 km, allt til og frá vinnu hjólaði bara ekkert annað í mánuðinum. Sleppti einum degi af því hjólið fór á verkstæði.  Gírarnir frusu fastir og vildi ég láta athuga hvort hægt væri að gera eitthvað í því. Skipt var um vír og hann smurður með efni sem átti að koma í veg fyrir að hann frysi fastur. Það virkaði í nokkra daga en svo festist hann aftur.

Sá að meðaltali 9 aðra á hjóli á leið minni til vinnu

Hér eru svo nokkrar myndir:

Framkvæmdir í Elliðaárdal, verið að setja upp ljósastaura

Viðbót 5.12.2017: