30. júní 2014

Hjólað í júní 2014

Í mánuðinum hjólaði ég samtals 292 km, þar af 159 km til og frá vinnu og 133 km annað.  
Hjólaði 14 af 19 vinnudögum mánaðarins til og frá vinnu, tók nokkra orlofsdaga.
Sá að meðaltali 18 á hjóli á dag til vinnu og 21 frá vinnu. Mest taldi ég 35 til vinnu og 36 á heimleiðinni.


Þetta meðaltal er miðað við talningu á morgnanna á leið til vinnu (kl. 7:30-8:00).  

Viðbót 7.7.2014.  Hér er svo pósturinn frá endomondo loksins kominn.  Ástæðan fyrir mismuni á km fjölda er að inni hjá endomondo er eitthvað labb líka sem ég tel ekki með í minni samantekt sem fjallar eingöngu um hjólreiðar.

27. júní 2014

Hjólakeppni hringinn í kringum landið.

Hjólreðakeppnin WOW cyclothon er að ljúka.  Öll lið eru komin í mark og aðeins einsaklingar eftir.  Enda er þetta ótrúleg þrekraun fyrir einstakling að hjóla allan hringinn á 3-4 sólarhringum.
Það hefur verið gaman að fylgjast með keppninni á netinu, þrátt fyrir tæknilega örðugleika þá hefur að mestu verið hægt að fylgjast með liðum og keppendum á Íslandskorti.
Þórhallur bróðir var fyrirliði í liði sem kallar sig Hreystimenn og voru þau í 18-20 sæti en þrjú lið tóku sig saman og hjálpuðust að og voru samferða síðustu 700 km og komu samtímis í mark.  Ég tók þessi þrjú skjáskot í gær.  Þau komu svo í mark kl. 16:45.





Eftir vinnu í gær ákvað ég að hjóla upp að Rauðavatni þar sem endamarkið var og freysta þess að verða vitni að því þegar hópurinn kæmi í mark.  Ég reiknaði út að það yrði um kl. 17 og að það tæki mig líklega 40 mín að komast þarna uppeftir.  Mér til mikilla vonbrigða fann ég ekki endamarkið en eftir að hafa þvælst fram og til baka (engar stuttar leiðir ef þú ætlar að fylgja stígakerfinu) þá náði ég engu að síður að verða vitni að því þegar hópurinn hjólaði meðfram vatninu og var það huggun harmi gegn.

Viðbót 30.6.2014:
Tók þessa mynd þegar ég sá hópinn hjóla framhjá.  Var reyndar frekar lengi að ná upp símanum og smella af svo þetta eru öftustu menn.

11. júní 2014

Gamla hjólið mitt.

Í lok maí setti ég sumardekkin undir gamla hjólið mitt.  Auðvitað settist ég upp á það og tók smávægilegan hring (hef ekki hjólað á því síðan ég fékk nýja hjólið) - og þvílíkt áfall.  Þetta hjól sem hefur verið mér tryggur ferðafélagi í 7 ár er hræðilegt, lætur illa að stjórn, er þung og mér fannst ég begja mig langt fram og vera með höfuðið niður við götu.  Mér leið verulega illa eftir þetta, hef aldrei upplifað hjól svona áður en ég hafði átt von á því að upplifa "komin heim" tilfinningu við að stíga á gamla fákinn.
Síðan þá hef ég einu sinni prófað hjólið aftur og nú ekki með sömu væntingar.  Það er enn eins og að fara á gamlan traktor en þó ekki eins slæm upplifun og síðast.  Mér finnst samt ekki spennandi að þurfa að hjóla á því næsta vetur og nú er spurningin hvað er til ráða?  Kannski ég steli hjólinu frá eiginmanninum en það er ekki eins svakalega þunglamalegt og þetta hjól.
En þó er rétt að taka fram að ég á eftir að láta yfirfara hjólið eftir veturinn og það gæti eitthvað skánað við það (vonandi).

31. maí 2014

Hjólað í maí 2014

Hjólaði samtals 303 km í mánuðinum, þar af 206 km til og frá vinnu og 97 km annað.  
Hjólaði 19 af 20 vinnudögum í mánuðinum til og frá vinnu, tók einn orlofsdag.
Sá að meðaltali 26 á hjóli á dag til vinnu (fór niður um 1 á síðasta degi mánaðarins) og 28 frá vinnu. Mest taldi ég 42 til vinnu og 46 á heimleiðinni.  Að venju er mikil fjölgun á hjólandi í maí út af átakinu "Hjólað í vinnuna" og í ár var met slegið í talningum hjá mér.  

Hér til hægri er stöðuuppfæsla sem  ég setti á Facebook 29. maí en þá leit út fyrir að meðaltal hjólandi í mánuðinum til vinnu væri 27.  Súluritið breytist hinsvegar lítið við að þeim fækki um einn.









Hér er til vinstri er samantektar myndin úr endomondo.
Þarna stendur að frá því ég hóf að skrá hjólaferðirnar mína hjá þeim (18. apríl 2013) þá hef ég brennt sem samsvarar 260 hamborgurum (bætt við 22 síðan í april) og hef hjólað 0,089 af leiðnni hringin í kringum hnöttinn og 0,009 af leiðinni til tunglsins.  Að meðal hraðinn hjá mér á hjólinu er 14 km/klst og ég hef samtals hjólað í 10 daga, 8 klst og 39 mín.












Hér er svo  talning mánaðarins.  Ég tel sem sagt alla sem ég sé á hjóli til og frá vinnu og skrái hjá mér.  Ég er um 20 mín á leiðinni til vinnu.  Ferðast á tímabilinu 7:30-8:00 og lang oftast meðfram Sæbrautinni.  Vegalengdin er rétt tæpir 6 km.  Á morgnana eru þetta því oftast fólk á leið til vinnu en seinnipartinn er fjölbreytnin meiri þ.e. bæði fólk á leið heim úr vinn og líka þeir sem fara út til þess að hjóla eingöngu sér til skemmtunar og heilsubótar og ég tel alla sem eru á hjóli, líka þá sem eru á þríhjóli.

22. maí 2014

Ótrúlegur fjöldi að hjóla núna í maí.

Það stefnir í metár í hjólatalningu hjá mér, eða a.m.k. met mánuð.  Þó mánuðurinn sé ekki liðinn þá stenst ég ekki að gera þessa samantekt.

Á myndinni er sem sagt talning á hjólandi fólki á leið minni til vinnu árin 2011-2014, yfirleitt á tímanum 7:30-8:00 og lang oftast ferðast ég meðfram Sæbraut, frá Holtagörðum og niður í miðbæ.  Þetta eru tæpir 6 km og er ég yfirleitt um 20 mín á leiðinni (fljótust verið 14 min að sumri í meðvindi og öll ljós ótrúlega hagstæð og lengst um klst í þungri vetrarfærð).  Svo ltiaði ég metfjölda hvers mánaðar með gulum lit.

Í maí mánuði í ár hefur veðrið verið einstaklega hagstætt.  Bjart og stillt vel felsta daga það sem af er mánuðinum.  En það var kaldara árið 2013 og enn kaldara 2012 (hef ekki skráð hjá mér veðurfar árið 2011).  Árið 2012 minnist ég á snjóföl um miðjan mánuðinn og 2013 var hitinn rétt yfir frostmarki fyrri hluta mánaðarins.

Eins og sést á myndinni þá er meðalfjöldi hjólandi á dag 18 öll árin nema í ár og stendur hann núna í 27.
Það verður spennandi að sjá hvort sú tala helst út mánuðinn.

13. maí 2014

Snyrtilega gengið frá eftir framkvæmdir.

Setti inn mynd af framvæmdum um daginn þar sem moldarhraukar voru á stígnum.  Nú er búið að moka ofan í skurðinn og sópa stíginn.  Snyrtilega gert.

12. maí 2014

Eiga hjól og bílar að fylgja sömu umferðareglum?

Alltaf er maður að læra eitthvað nýtt.  Rakst á grein sem heitir:

Why cyclists should be able to roll through stop signs and ride through red lights

og það fyrsta sem ég hugsaði var "það sem mönnum dettur í hug", en svo las ég greinina og það er alveg vit í því sem verið er að segja.  Altsvo að fyrir hjólandi ættu stopp-merki að virka eins og biðskyldumerki fyrir bíla og rautt ljós eins og stopp-merki.  Lesið greinina (smella á stóru stafina hér fyrri ofan) hún útskýrir þetta nokkuð vel.

5. maí 2014

Breyting á viðmóti þeirra sem aka bíl.

Ég er sem sagt komin á nýtt hjól sem er einstaklega fallegt og dömulegt.  Var áður á einhverskonar fjallahjóli (sjá myndir).  Mér fannst menn (karlar og konur) almennt kurteisir gagnvart mér í umferðinni og stoppa til að hleypa mér yfir götur o.þ.h.  En núna á nýja hjólinu finn ég að það var ekki neitt neitt, núna stoppa menn undantekningalítið og gefa mér meira pláss ef eitthvað er.  Enn er ég í sömu fötunum og áður og tel mig hjóla mjög svipað og áður svo eina breytingin hjá mér er hjólið sjálft.  Það er ótrúlegt að upplifa þetta.




3. maí 2014

Grein sem heitir: WHY IT MAKES SENSE TO BIKE WITHOUT A HELMET

Reiðhjólahjálmar, endalaust þrætuepli.  En hér (smelltu á þessa setningu) er slóð á grein sem útskýrir, að mér finnst, hversvegna ekki er sérstök ástæða til að vera með hjálm þegar maður hjólar, ekki frekar en þegar maður  fer út að ganga eða út í bíl að keyra.  Endilega lestu greinina, en hér eru nokkrar tilvitnanir úr henni:

"Let's first get one thing out of the way: if you get into a serious accident, wearing a helmet will probably save your life. "

"But a broader look at the statistics show that cyclists' fear of head trauma is irrational if we compare it to some other risks. Head injuries aren't just dangerous when you're biking—head injuries are dangerous when you're doing pretty much anything else. There's ample evidence showing that there's nothing particularly special about cycling when it comes to serious head injuries."

"Let's be clear. I am NOT trying to say that studies definitively show that cycling is safer than driving or walking. That is not the case. The studies that are out there give us mixed messages about the relative safety of the different modes of transport. What I am saying is that these statistics raise an interesting question: If we're so concerned about head injuries, why don't we wear helmets all the time? Why do places that have mandatory helmet laws for cyclists not have them for drivers or pedestrians? A 1996 Australian study suggests that a mandatory helmet law for motor vehicle occupants could save seventeen times more people from death and serious head injury than a similar law for cyclists."


2. maí 2014

Framvkæmdir á og við stíga meðfram Sæbraut


Við Sæbraut, frá Hörpu og að Kringlumýrarbraut er verið að búa til hjólastíg (efri myndin er frá þeim stað og var tekin við upphaf framkvæmda).  Neðri myndin horfir í átt að gatnamótum Sæbrautar/Dalbrautar og var tekin á miðvikudaginn.  Ég ímynda mér að þarna séu einhverjar lagnaframkvæmdir, en lítið pláss er eftir á stígnum eins og sést á myndinni.  Út af þessum framkvæmdum ætla ég að hjóla aðra leið til og frá vinnu.   Þ.e. Laugardalur-Suðurlandsbraut-Laugavegur.  

Það er svo sem ágætis leið, aðeins styttri en Sæbratuin, en fleiri hættur vegna þess að það eru fleiri gatnamót að fara yfir.  Hér er kort af leiðunum tveimur.  Vanalega fer ég bláu leiðina, en fer núna eftir þeirri grænu.  Ég setti rauða punkta þar sem gatnamót eru og nauðsynlegt er að vera vel vakandi.  Á grænu leiðinni eru 20 punktar (fyrir utan að þegar ég fer í gegnum Laugardaginn, sérstaklega eftir vinnu að þá eru oft margir á ferli og þarf að fara varlega) en á bláu leiðinni eru punktarnir 14 og langur kafli sem er punktalaus.  Þó hefur græna leiðin batnað til muna eftir að kominn er þar hjólastígur og ekki skemmir hjólateljarinn fyrir (setti fjólubláan punkt með X-i þar sem teljarinn er).


1. maí 2014

Hjólað í apríl 2014

Hjólaði samtals 224 km í mánuðinum, þar af 157 km til og frá vinnu og 67 km annað.  
Hjólaði ekki nema 15 af 18 vinnudögum í mánuðinum til og frá vinnu (náði mér í pest og lá í henni yfir helgi en var svo 3 vinnudaga (+ páska) að ná upp krafti til að hjóla).
Sá að meðaltali 11 á hjóli á dag til vinnu og 16 frá vinnu. Mest taldi ég 16 til vinnu og 38 á heimleiðinni (í gær 30. apríl, mikil fjöldaaukning þessa vikuna).  

Hér er til vinstri er samantektar myndin úr endomondo.
Þarna stendur að frá því ég hóf að skrá hjólaferðirnar mína hjá þeim (18. apríl 2013) þá hef ég brennt sem samsvarar 238 hamborgurum (bætt við 15 síðan í mars) og hef hjólað 0,082 af leiðnni hringin í kringum hnöttinn og 0,009 af leiðinni til tunglsins.  Að meðal hraðinn hjá mér á hjólinu er 14 km/klst og ég hef samtals hjólað í 9 daga, 13 klst og 27 mín. 

Svo auðvitað aðal fréttin frá apríl að ég keypti mér nýtt hjól.

Hér er svo tölfræði af því hún er svo skemmtileg.

Á þessari mynd sést heildar vegalegnd sem ég hef hjólað í hverjum mánuði af þessum fjórum sem liðnir eru af árinu.  Apríl er lægstur út af páskunum og veikindum.

Hér er samantekt á talningu á hjólreiðamönnum á leið minni til vinnu.  Meðaltal er meðaltalsfjöldi þeirra hjólandi sem ég sé þá daga sem ég hjóla til vinnu.

Og hér er svo samanburður milli ára og það er greinilega fleiri sem hjóla yfir vetrarmánuðina.

Viðbót 5.5.2014.  Þetta kom í pósti frá Endomondo

27. apríl 2014

Nýtt hjól!!!

Stór dagur í mínu lífi í gær.  Lét drauminn rætast og keypti mér fallegt borgarhjól.  Af því ég er í hærri kantinum þá var ekki auðvelt að finna hjól í minni stærð.  Við hjónin vorum búin að skoða margt og mikið á netinu en ákváðum að fara í vettvangskönnun í gær.  Byrjuðum á því að fara í Reiðhjólaverzlunina Berlín.  Þar eru mjög mörg falleg hjól til sölu.  Hann átti ekki til hjól í minni stærð en ný sending var væntanleg í maí.  Næst fórum við í Kríu úti á Granda.  Þar áttu þeir eitt hjól sem passaði mér og ég fékk að prófa og það er svona dásamlega ljúft.  Svo við gerðumst kærulaus og keyptum það á staðnum.


Þetta er 8 gríra hjól (gírarnir innbyggðir í öxulinn á dekkinu) með handbremsum (V-bremsur) og dinamó ljós að framan og aftan (innbyggt í dekkið líka).  Dekkin eru mjó og slétt með endurskinsrönd allan hringinn, stýrið hátt og brettin eru með drullusokkum neðst. Bögglaberi aftan á hjólinu með körfu sem auðvelt er að taka af.

Jómfrúar ferðin var farin frá búðinni og heim þar sem ekki tókst að koma hjólinu á hjólastandinn okkar, ætlum að athuga með svona stöng sem hægt er að fá.  Annars verður gamla hjólið mitt notað sem utanbæjar- og vetrarhjól.  Þar sem ekki er hægt að setja nagladekk undir nýja hjólið án þess að taka brettin af og það er bara kjánalegt.

Er mjög sátt eftir fyrstu hjólaferðina og hlakka til að hjóla í dag og alla næstu daga.

Hér er svo mynd af fyrstu hjólaferðinni tekið af endomondo.com.

23. apríl 2014

Hjólabraut við Sæbraut

Framkvæmdir hafnar að hjólastíg meðfram Sæbraut.  Og það var glampandi sól í morgun og dásamlegt að hjóla.  Veðurspáin er mjög góð fyrir næstu daga en langtímaspá telur að það eigi enn eftir að koma næturfrost svo ég læt naglana vera undir hjólinu aðeins lengur þó það sé mjög svo freistandi að fara á sumardekkin.

16. apríl 2014

Páskahret


Fór heim á hádegi á föstudag með pest.  Mætti í vinnuna í gær (þriðjudag) en treysti mér ekki til að hjóla þar sem ég var ekki komin með fullan kraft aftur, en vonaðist til að geta hjólaði í dag.  En því miður, enn einn dagurinn sem ég stíg ekki á hjólið og það er leiðinlegt.  Ekki síst vegna þess að mig langar að ná 100% hjóli á virkum dögum til og frá vinnu.  Þeim áfanga náði ég í febrúar en núna í apríl er staðan í 50%, en það eru 6 virkir dagar eftir að mánuðinum svo ég gæti náð þessu upp í rúm 80% ef ég hjóla þá alla.  Það er eitthvað til að stefna að.

En að veðrinu, það sem sagt fór að snjóa í gærdag eftir ágætis vorveður.  Spáð rigningu eða slyddu næstu daga og einhver blástur.

7. apríl 2014

Tjaldurinn mættur.

Á leið í vinnu í
morgun, stóðst ekki mátið að smella af þeim mynd.

Vorboði, ég er þó enn á nagladekkjunum og stefni á að taka þau ekki undan hjólinu fyrr en eftir páksa.

4. apríl 2014

Útilistaverk. Veggjaskraut við Sæbraut.

Framhjá þessum vegg hjóla ég næstum á hverjum degi og hef oft hugsað hversu tilvalinn hann væri til myndskreytinga.  Menn hafa svo sem verið duglegir að spreyja tákn og annað á hann en ná ekki upp nema í takmarkaða hæð og það hefur virkar oft meira eins og krass.  Þess vegna gladdist ég að sjá þessar myndir sem komnar eru núna.
  



1. apríl 2014

Hjólað í mars

Hjólaði samtals 278 km í mánuðinum, þar af 212,7 km til og frá vinnu og 65,3 km í annað.  
Hjólaði 19 af 21 vinnudögum í mánuðinum til og frá vinnu (einn veikindadagur og spurngið afturdekk einn morguninn).
Sá að meðaltali 7 á hjóli á dag til og frá vinnu. Mest taldi ég 14 til vinnu og 17 á heimleiðinni.  Einn daginn sá ég engan annan á hjóli, það var 26. mars en þá hafði verið spáð leiðinda veðri, það er samt mjög óvenjulegt að sjá engan.  Á heimleiðinni þann sama dag sá ég einn annan á hjóli.

Nú er orðið albjart á morgnana og ekki þörf á að kveikja ljósin á hjólinu.  Fyrri part mánaðarins ríkti vetur en nú er eins og vorið sé komið og að sjálfsögðu heldur maður í þá von.  Þó er ég enn á nagladekkjunum og mun ekki taka þau undan fyrr en í lok mánaðarins þar sem ég vil ekki taka áhættuna á því að komast ekki til vinnu á hjólinu ef veðrið versnar.

Er nýlega búin að uppgötva þessa mynd inni í endomondo.com (forritið sem heldur utan um hreyfinguna hjá mér).
Þarna stendur að frá því ég hóf að skrá hjólaferðirnar mína hjá þeim (18. apríl 2014) þá hef ég brennt sem samsvarar 223 hamborgurum og hef hjólað 0,076 af leiðnni hringin í kringum hnöttinn og 0,008 af leiðinni til tunglsins.  Að meðal hraðinn hjá mér á hjólinu er 14 km/klst og ég hef samtals hjólað í 8 daga, 23 klst og 30 mín.  Allt tilgangslausar staðreyndir en samt svo gaman að vita.

Viðbót 7.4.2014
Var að fá póst frá endomondo með upplýsingum um hreyfingu í mars.  Þarna inni er mjög stuttur göngutúr sem ég fór í og útskýrir ósamræmi milli talna.

25. mars 2014

Munur á mótvindi og meðvindi 11 mín.



Í gær var ég rétt tæpar 29 mínútur að hjóla heim.  Þá var mótvindur og rigning.

Í dag fór ég sömu leið heim og var rétt um 17 og 1/2 mín á leiðinni lítill vindur og með mér, engin rigning.  Það munar um vindinn get ég sagt ykkur.

13. mars 2014

Carmina Burana eftir Carl Orff

Er að fara að flytja þetta verk um helgina.  Hérna er skemmtileg uppfærsla á því sett í leikrænan búning.  Frábært verk sem fjallar um nautnir, ástir, náttúruna, drykkju og át og fleira.  Okkar uppsetning er minni í sniðum varðandi hljóðfæri en hljómsveitin samanstendur af tveimur flyglum og slagverki allskonar.  Í dag æfum við í fyrst skipti með hljómsveit og einsöngvurum, hlakka til.

8. mars 2014

Fékk töluvpóst frá endomondo.  Inni í þessu er smávægilegt labbi/skokk.
Gaman að þessu.

6. mars 2014

Það snjóar

Svona leit hjólið út (komið inn í skúr) eftir að hjóla heim, reyndar er ég búin að banka svolítið af snjónum af.  En mesti snjórinn var þó hér heima við húsið því búið er að hreinsa stígana og göturnar sem ég ferðast eftir.

1. mars 2014

Hjólað í febrúar 2014

Hjólaði samtals 262 km í mánuðinum, þar af 216 km til og frá vinnu og 46 km í annað.  Hjólaði alla 20 vinnudagana í mánuðinum til og frá vinnu.
Sá að meðaltali 6 á hjóli á dag til vinnu og 8 á heimleið. Mest taldi ég 8 til vinnu og 24 á heimleiðinni, nei ég er ekki að misrita.  Einn daginn er nefninlega hjólahópur af ferðamönnum á sömu leið og ég á sama tíma, ef ég tel þau ekki með þá sá ég mest 16 og fæst voru það 1 til vinnu og 2 á leiðinni heim.

24. febrúar 2014

Morgunskíman

Á föstudaginn sá ég rétt móta fyrir fjöllunum þegar ég hjólaði í vinnuna.  Núna (mánudagsmorgun) sést birta á himni þar sem fjöllin eru lægst.  Þetta er allt að koma.

22. febrúar 2014

Gaman að hjóla.

Það er svo mikill munur að hjóla þessa dagana eftir að klakinn og ójafnan er farin af leiðinni sem ég hjóla.  Svo er líka ennþá bjart þegar ég hjóla heim eftir vinnu og óðum styttist í að það verði bjart líka á morgnana.  Sá móta fyrir fjöllunum í gærmorgun og það lofa góðu.

Hlakka til að taka nagladekkin undan hjólinu en það geri ég venjulega í apríl/maí ef ég man rétt.

19. febrúar 2014

Óhapp

Féll af hjólinu í gær á leiðinni heim úr vinnu.  Þetta var eins kjánalegt og það getur verið held ég.  Beið á ljósum eftir að fá grænt.  Um leið og það gerist spyrni ég af stað en á sama tíma rek ég endann á stýrinu í staur sem er við hliðina á mér með þeim afleiðingum að stýrið snýst og ég næ ekki áttum og enda í götunni.
Þetta var þó ekki alvarlegra en svo að stuttu seinna stíg ég aftur upp a hjólið og hjóla heim. En mér tókst ekki að bera fyrir mig hendurnar svo ég skrapaði götuna með andlitinu og hlaut af sár á höku og spungna vör.  Annað glerið í gleraugunum mínum rispaðist líka hressliega.  Tveir vegfarendur (annar gangandi hinn á hjóli) litu til með mér hvort allt væri ekki í lagi sem var fallega gert af þeim.

Ef þú lesandi góður skyldir lenda í einhverju svipuðu þá hef ég eftirfarandi heilræði.  Ekki æða af stað burt af staðnum, gefðu þér tíma til að ná áttum og athuga hvort þú sjálf(ur) sért í heilu lagi og hvort hjólið sé í lagi.  Fyrstu viðbrögð hjá manni er flótti (allavega hjá mér) að vilja komast sem allra fyrst í burtu en það borgar sig að taka því rólega.

10. febrúar 2014

Mig langar í þetta hjól.

Reiðhjólaverzlunin Berlín er að selja svo einstaklega fallegar hjólavörur.  Og fyrir stuttu fengu þau inn ný hjól og ég hef fundið draumahjólið mitt.  Hafið þið séð aðra eins fegurð?


1. febrúar 2014

Janúar 2014 - hjólasamantekt.

Hjólaði samtals 254,5 km í mánuðinum allt til og frá vinnu þar af 230,5 km til og frá vinnu og 24 km í annað.  Hjólaði 21 af 22 vinnudögum í mánuðinum til og frá vinnu, sleppti einum vegna jarðarfarar (þ.e. ég hjólaði ekki heim eftir vinnu og ekki í vinnuna morgunin eftir).
Sá að meðaltali 7 á hjóli á dag bæði til og frá vinnu. Mest taldi ég 14 til vinnu og 12 á heimleiðinni og fæst voru það 2 til vinnu og 1 á leiðinni heim.


Klaki var yfir öllu mestan hluta mánaðarins.  Seinni partinn var hann þó farin að láta undan og stígar orðnir að mestu auðir og þá snjóaði aftur.  En sá snjór virðist ekki ætla að stoppa lengi við.

24. janúar 2014

Brýrnar á Geirsnefi

Hjólaði loksins yfir brýrnar á Geirsnefi.  Átti leið upp á Bíldshöfða eftir vinnu og tók smá útúrdúr til að fara yfir brýrnar.
Og af því þetta er stórviðburður í mínu lífi þá vildi ég taka mynd...
En þessi var augljóslega ekki nógu góð svo ég ákvað að taka aðra og reyna nú að brosa smá...
ó nei þessi er hræðilega líka, prófa enn einu sinni...

He he... þessi fyrsta var nú ekki svo slæm eftir allt saman.

7. janúar 2014

Jibbí! Hjólateljarinn er aftur farin að telja hjól.


Viðbót:
Gleðilegt að sjá þessa tölfræði frá í gær:


Og álíka sorglegt að sjá tölfræðina frá tímabilinu þar sem mælirinn var óvirkur:

3. janúar 2014

Enn um hjólateljaran við Suðurlandsbraut

Hann hefur ekki talið eitt einasta hjól síðan um áramótin enda er enn klakabrynja yfir stígum. Sendi athugasemd til Reykjavíkurborgar í gegnum "Borgarlandið - fyrir þínar ábendingar".  Vona að brugðist verði vel við ábendingunni og klakinn hreinsaður af stígnum þó ekki sé nema bara á þessum bletti sem sér um að skynja hjólin.

1. janúar 2014

Hjólaárið 2013

Hjólaði samtals 3.114 km á árinu (smá skottúrar ekki taldir með) mest eru þetta ferðir til og frá vinnu eða 2.348 km og 766 í aðrar ferðir.  En ég hjólaði 213 af 249 vinnudögum ársins.  Af þessum 36 vinnudögum sem ekki voru hjólaðir eru 4 vegna ófærðar, 4 vegna veikinda og restin er svo orlof eða annarskonar frí.

Hér er mynd sem sýnir talningu mína á hjólandi fólki á morgnana milli kl. 7.30 og 8 (þ.e. þegar ég hjóla til vinnu, oftast meðfram Sæbrautinni).


Og svona dreifast hjólaðir kílómetrar á mánuðina.

Og að lokum er ég með hér samanburð á talningu á hjólandi fólki milli ára: (þetta er sem sagt meðaltal talninga á vinnudag í viðkomandi mánuði)

Desember 2013

Hjólaði samtals 174 km í mánuðinum allt til og frá vinnu.  Hjólaði 16 af 20 vinnudögum í mánuðinum til og frá vinnu, sleppti fjórum dögum vegna orlofs og hátíðanna.
Sá að meðaltali 5 á hjóli á dag til vinnu og 4 frá vinnu. Mest taldi ég 12 til vinnu og 9 á heimleiðinni og fæst voru það 1 til vinnu og tvisvar sá ég engan á leiðinni heim.


Snjór var í borginni allan mánuðinn, einn morguninn var ekki búið að skafa og var ég þá 42 mín til vinnu, annars var meðal ferðatíminn í desember 26 mín.

Hjólaárið 2024 - 3.281 km

VEGALENGDIR OG DAGAFJÖLDI Hjólaði samtals 3.281 km á árinu. Hjólaði 1.689 km til og frá vinnu og 1.965 km í aðrar ferðir. Ég hjólaði 208...